Túrkııada úsh kúnde 900-ge jýyq jer silkinisi tirkeldi
ASTANA. KAZINFORM — Túrkııanyń Syndyrgy aýdany úsh kún ishinde seısmıkalyq belsendiliktiń kúsheıýin bastan ótkerdi. Munda 900-ge jýyq jer silkinisi bolǵan, dep habarlaıdy Kazinform agenttiginiń menshikti tilshisi.
Túrkııanyń Tótenshe jaǵdaılardyń aldyn alý jáne zardaptaryn joıý basqarmasynyń (AFAD) málimetinshe, 10-12 tamyz aralyǵynda Balykesır provıntsııasynyń Syndyrgy aýdanynda jalpy 879 jer silkinisi tirkeldi.
Jarııalanǵan málimetterge sáıkes, jer asty dúmpýleriniń basym kópshiligi shamamen 745, magnıtýdasy 3,0-den az bolǵan jáne turǵyndardyń kópshiligi sezbegen. Degenmen, 120 jer silkinisiniń kúshi 3,0-3,9, al taǵy 17-si 4,0-4,9 balǵa jetken.
Sońǵylary jergilikti halyq arasynda alańdaýshylyq týdyrdy: dúmpýler aıqyn sezilip, turǵyndar úılerinen shyǵyp ketti, sebebi yqtımal qıraý men qaıtalanǵan silkinisterden qaýiptendi.
Bılik jaǵdaıdy baqylaýda ustap otyr jáne azamattardy sabyr saqtaýǵa, resmı habarlamalardy qadaǵalaýǵa jáne qaıtalama seısmıkalyq oqıǵalarǵa daıyn bolýǵa shaqyryp otyr.
AFAD mamandary mundaı belsendilik aımaqtaǵy jer qyrtysy jaryqtaryndaǵy kerneýdiń áseri bolýy múmkin ekenin jáne Túrkııanyń álemdegi eń seısmıkasy joǵary aımaqtardyń birinde ornalasqanyn eske salady.
Qazirgi ýaqytta seısmıkalyq belsendilik aımaǵynda úıleri jaramsyz dep tanylǵan turǵyndar arnaıy turmystyq konteınerlerge ornalastyrylyp jatyr.
Buǵan deıin Balykesırdegi jer silkinisi Túrkııaǵa seısmıkalyq qaýiptiń ózektiligin eske salǵan edi. Sarapshylar qalalardy nyǵaıtý boıynsha shuǵyl sharalar qabyldaýdy talap etip otyr.