Túrkııada úsh qalanyń meri ustaldy

ASTANA. KAZINFORM – Túrkııada Antalııa, Adana jáne Adııaman qalalarynyń merleri Muhıtdın Bodjek, Zeıdan Karalar jáne Abdýrrahman Týtdere ustaldy. Olarǵa sybaılas jemqorlyqqa qatysty aıyp taǵyldy, dep habarlaıdy Kazinform DW-ge silteme jasap. 

Jergilikti BAQ-tyń habarlaýynsha, Muhıtdın Bodjekpen birge onyń uly da qamaýǵa alynǵan.

Qala meri qamaýǵa alynǵannan keıin Adanada oppozıtsııalyq saıasatkerlerdiń tutqyndalýyna jáne Túrkııa prezıdenti Rejep Taıyp Erdoǵan men onyń úkimetiniń otstavkaǵa ketýine narazylyq sherýi ótti. 

– Sot júıesin saıası kek alýdyń qarýyna aınaldyratyndar zańnyń qamyn oılamaıdy, óz bıligin qorǵaýdy oılaıdy. Biz halyqtyń erkine shabýyl jasaıtyn bul júıege eshqashan baǵynbaımyz, - dep jazdy JEO tóraǵasy Býrhanettın Býlýt X áleýmettik jelisinde.

Bir kún buryn Izmırdiń burynǵy meri Týnch Soıer men Izmır provıntsııasynyń gýbernatory Shenol Aslanoǵlý, sonymen birge JEO ókili sybaılas jemqorlyqqa qatysy bar degen aıyppen qamaýǵa alyndy. 

Eske sala keteıik, buǵan deıin Túrkııa Erdoǵannyń áskerı ókilettigin keńeıtýi múmkin ekenin jazǵan edik.