Túrkııada Ulttyq egemendik jáne balalar kúni atalyp ótti

ASTANA. KAZINFORM — 23 sáýirde Túrkııada Ulttyq egemendik jáne balalar merekesi el boıynsha keńinen atalyp ótedi. Alaıda búgin merekelik kóńil kúıdi Stambýldaǵy jer silkinisteri buzdy, dep habarlaıdy Kazinform agenttiginiń menshikti tilshisi. 

23 sáýir Túrkııada resmı demalys kúni bolyp esepteledi. Jaqyn ýaqytqa deıin bul merekeniń shyǵý tarıhy biraz umyt qalǵan edi. Onyń paıda bolýyna qatysty ártúrli nusqalar bolǵanymen, bul kún birneshe mańyzdy oqıǵany biriktiretini anyq.

Mereke alǵash ret 1920 jyly Túrkııanyń Uly Ulttyq Májilisi (Túrkııa Parlamenti) qurylǵan kezde bastaý alǵan. 1921 jyldan bastap bul kún alǵashqy ulttyq mereke retinde atala bastady, al 1927 jyldan bastap Mustafa Kemal Atatúriktiń bastamasymen bul kún balalar merekesi mártebesin de ıelendi.

Bul kúni búkil el boıynsha saltanatty is-sharalar ótedi, balalar ulttyq tý tústerindegi kıimder kıip, kontsertke qatysady, ári sımvolıkalyq túrde eresekterdiń ákimderdiń, mınıstrlerdiń, tipti prezıdenttiń  qyzmetterin atqarady. Qalalarda týlar men Atatúriktiń portretteri ilinedi, balalar taýarlaryna arnalǵan jármeńkeler men jeńildikter uıymdastyrylady. Mereke — ult bolashaǵy retinde balalardyń mańyzyn bildiredi.

Alaıda bıyl Ulttyq egemendik jáne balalar kúnin atap ótý Ystambul mańyndaǵy jer silkinisterine baılanysty kóleńkede qaldy. Bılik pen halyq memlekettik merekeniń mańyzdylyǵyna qaramastan, seısmıkalyq jaǵdaıǵa nazar aýdarýǵa májbúr boldy.

Túrkııa Parlamentiniń tóraǵasy Nýman Kýrtýlmýsh aldaǵy ýaqytta kúshti jer silkinisi bolýy múmkin ekenin aıtyp, daıyn bolý qajet ekenin jetkizdi.

Bilim mınıstri ıÝsýf Tekın 24 jáne 25 sáýir kúnderi mektepterde sabaq bolmaıtynyn habarlady.

— Qurylystarda aıtarlyqtaı zaqym joq. Tek eki mektepte sylaqtarda jaryqtar bar. Sheshim aldyn alý sharasy retinde qabyldandy, — dedi mınıstr.

Іshki ister mınıstrligi mektep ǵımarattaryn qajet bolǵan jaǵdaıda jınalý nemese shuǵyl kómek kórsetý ortalyqtaryna aınaldyrý úshin bosatýdy tapsyrdy.

Túrkııa Úkimeti janyndaǵy Tótenshe jaǵdaılardyń aldyn alý jáne zardaptaryn joıý basqarmasynyń (AFAD) málimetinshe, sońǵy tórt saǵatta Ystambulda shamamen 60 jer silkinisi tirkelgen.

Sonymen qatar, qala turǵyndarynyń bir bóligi qaýipsizdik maqsatynda basqa aımaqtarǵa ýaqytsha kóship jatyr.

Buǵan deıin Stambýlda kúshti jer silkinisi bolǵany habarlanǵan edi. Sarapshylar jer silkinisiniń qaıtalaný múmkindigin eskertti. Bir saǵattyń ishinde jeti jer silkinisi tirkelip, olardyń saldarynan týyndaǵan dúrbeleń kezinde 150-den astam adam jaraqat aldy.

Túrkııa Prezıdenti Rejep Taıyp Erdoǵan Ystambul turǵyndaryna qoldaý bildirdi.

Qazaqstan Respýblıkasynyń Bas konsýldyǵy ázirge qazaqstandyq azamattardan eshqandaı ótinish túspegenin málimdedi.

Eske sala keteıik, 2023 jylǵy 6 aqpanda bolǵan joıqyn jer silkinisteri kezinde Túrkııada 48 448 adam qaza tapqan bolatyn.