Túrkııada Twitter-den keıin ile-shala Google DNS-servıs júıesine de tosqaýyl qoıyldy
ASTANA. QazAqparat - Túrkııa bıligi Google izdeý júıesiniń DNS-servısine de shekteý qoıdy. Ony jergilikti turǵyndar tosqaýyl qoıylǵan Twitter-ge kirý úshin paıdalanyp kelgen bolatyn, dep habarlady RBK Bloomberg-ke silteme jasap.
Túrkııa Premer-Mınıstri Redjep Taııp Erdoǵan keńsesi jarııa etken málimdemede bul qadamnyń zańsyz jolmen alynǵan ári jalǵan jazbalardy jarııa etip otyrǵan Twitter-ge qarsy aldyn alý sharalar retinde túsindirýde.
Jarııa etilgen málimdemege sáıkes, bılik atalǵan kompanııa el talabyn tolyǵymen oryndaǵan jaǵdaıda ǵana Twitter-di paıdalanýǵa qoıylǵan shekteýdi almaq. Aıta keterligi, Twitter-den alynǵan beınerolıkter men stenogrammalardy paıdalanýshylarǵa taratyp otyrǵan Facebook pen YouTube-ge de shekteý qoıý qaýpi tónip tur. Aıta keteıik, Twitter Túrkııadaǵy jemqorlyq daý-damaımen baılanysty materıaldar men qujattardy ornalastyrýda basty alań bolyp otyr. Al ony Erdoǵan ózine jáne óziniń seriktesterine qarsy baǵyttalǵan áreket dep sanaýda.
