Túrkııada Túrkistannyń týrıstik áleýeti tanystyryldy
TÚRKІSTAN. QazAqparat - Túrkııanyń Antalıa qalasynda «XIII Jibek joly elderi qalalarynyń merleri» atty halyqaralyq forýmy ótti. Jibek jolynyń boıynda ornalasqan memleketterdiń týrızm salasyn damytý maqsatynda uıymdastyrylǵan sharaǵa álemniń damyǵan 30 elinen 200-ge jýyq ókil qatysty, dep habarlaıdy QazAqparat tilshisi.
Tórt kúnge sozylǵan jıynda qatysýshylar týrızm salasynyń jahandanýyn, ekonomıkalyq áriptestik pen mádenı tájirıbe almasýdy nyǵaıtý máselelerin keńinen talqylady. Halyqaralyq sharaǵa Qazaqstannyń atynan Túrkistan oblysynyń delegatsııasy qatysty. Jumysshy topty bastap barǵan tarıhshy, ǵalym Sattar Májıtov bul forým memleketter arasyndaǵy iskerlik baılanysty ornatýda taptyrmas alań ekenin aıta kele, jıynda kóterilgen máselelerdi qoldaıtynyn jetkizdi. Óz kezeginde Antalıa qalasynyń meri Menderes Týrel, kóne qalanyń týrıstik áleýetine qyzyǵýshylyq tanytyp, forýmǵa qatysqan Túrkistan oblysynyń ókilderine alǵysyn bildirdi. Sondaı-aq, tarıhı - mádenı muralarǵa baı óńirdi damytýǵa Qazaqstan ǵana emes, kúlli túrki álemi nıetti ekenin de jetkizdi. ıAǵnı, forýmǵa qatysýshylar óńirdiń týrıstik áleýetin joǵary baǵalap, aldaǵy ýaqytta iskerlik qarym-qatynas ornatýǵa daıyn ekenin bildirdi.
Aıta keteıik, Túrkistan qalasyna keletin sheteldik qonaqtardyń sany ýaqyt ótken saıyn artyp keledi. Máselen, ótken jyly 1 mln. 160 myń týrıst shaharǵa taban tiregen bolsa, bıyl 8 aıdyń ózinde 900 myńǵa tarta qonaq jetken.
