Túrkııada túrki elderiniń fýtbolshylary jergilikti oıynshylarmen teńestirilmek
ASTANA. KAZINFORM — Túrkııanyń klýbtarynda oınaıtyn, túrki elderinen kelgen fýtbolshylardyń mártebesi jergilikti oıynshylarmen teńestirilmek, dep habarlaıdy Kazinform agenttiginiń Ankaradaǵy menshikti tilshisi.
Bul týraly Túrkııanyń bıliktegi Ádilet jáne damý partııasy tóraǵasynyń orynbasary jáne túrki memleketterimen baılanys jónindegi dırektsııanyń basshysy Kıýrshad Zorlý Kojaelı provıntsııasynda ótken túrki áleminiń jastarynyń kezdesýinde málimdedi.
Ol bul bastamany Túrkııa fýtbol federatsııasy, sondaı-aq jastar men sportqa jaýapty tıisti mınıstrlik qoldaıtynyn málimdedi. Qazirgi ýaqytta Túrkııa basqa túrki elderiniń sport mınıstrlikterinen jaýap kútip otyr.
Zorlý bul jańalyq baýyrlas elder arasyndaǵy sporttyq baılanystardy nyǵaıtyp, jas fýtbolshylardyń damýyna múmkindikter ashatynyn atap ótti. Ol shamamen 200 mıllıon halqy bar túrki áleminiń áleýetin biriktirý ulttyq komandalardyń básekege qabilettiligin arttyrýǵa yqpal etedi dep sanaıdy.
Sonymen qatar, kezdesýde túrki memleketteriniń komandalary arasynda eki jylda bir ret «Túrki kýbogy» fýtbol týrnırin ótkizý usynyldy. Zorlý bul jarys bolashaǵy zor jas oıynshylardy anyqtaýǵa jáne olardyń kásibı ósýine jaǵdaı jasaýǵa kómektesedi dep málimdedi.
Eger bastamany basqa elder maquldasa, tıisti sheshimder qazan aıynyń sońynda Ankarada ótetin túrki elderi kóshbasshylarynyń sammıtinde resmı túrde jarııalanýy múmkin.
Eske sala keteıik, 9-11 qarasha aralyǵynda Kojaelı qalasynda ár elden 500-ge jýyq jas qatysqan «Túrki áleminiń jastary» atty kezdesý ótken bolatyn.
