Túrkııada týrızmdi jyl boıy damytý josparlanyp otyr
ASTANA. KAZINFORM – Túrkııa bıligi týrıstik belsendilikti eldiń barlyq tórt maýsymyna jáne barlyq óńirine taratý josparlap otyr, dep habarlaıdy Kazinform agenttiginiń Ankaradaǵy menshikti tilshisi.
Túrkııanyń Mádenıet jáne týrızm mınıstri Mehmet Nýrı Ersoı eldiń týrıstik áleýetin odan ári damytý qajettigin atap ótti.
Onyń aıtýynsha, Túrkııanyń ár óńiri biregeı tabıǵı jáne mádenı qundylyqtarǵa ıe. Baı tarıhı muranyń, tabıǵı kórikti jerler men qonaqjaılyqtyń úılesýi elge álemniń túkpir-túkpirinen týrıster qabyldaýǵa múmkindik beredi.
— Biz tabıǵı jáne mádenı muramyzdy saqtap, ony keleshek urpaqqa jetkize otyryp, týrızmdi Túrkııanyń barlyq tórt maýsymyna jáne 81 provıntsııasyna taratý baǵytynda jumys istep jatyrmyz, — dedi túrik mınıstri.
Ersoı tabıǵı jáne mádenı murany saqtaý ári ony keleshek urpaqqa jetkizý memlekettik týrıstik saıasattyń negizgi baǵyttarynyń biri ekenin atap ótti. Sonymen qatar onyń aıtýynsha, týrıstik belsendilik jekelegen óńirlermen jáne jyldyń belgili bir kezeńderimen shektelmeýi kerek.
Buǵan deıin bıylǵy ekinshi toqsanda Túrkııanyń týrızmnen túsetin tabysy ótken jylmen salystyrǵanda 2,6 paıyzǵa azaıǵanyn jazǵan edik.
Aıta ketelik Túrkııa Aıǵa ushatyn apparatyn ázirleýdi aıaqtaǵan edi.
