Túrkııada týrızm salasynyń tabysy tómendedi
ASTANA. KAZINFORM - 2026 jyldyń ekinshi toqsanynda Túrkııanyń týrızm salasynan túsken tabysy ótken jyldyń sáıkes kezeńimen salystyrǵanda 2,6%-ǵa azaıdy, dep habarlaıdy Kazinform agenttiginiń Ankaradaǵy menshikti tilshisi.
Túrkııa statıstıka ınstıtýtynyń (TÜİK) málimetine sáıkes, esepti kezeńde eldiń týrızmnen túsken kirisi 15,865 mlrd AQSh dollary boldy.
Týrıstik túsimniń negizgi bóligi — 15,656 mlrd dollar — sheteldik týrıster esebinen qalyptasty. Al tranzıttik jolaýshylardan 209,5 mln dollar tústi. Týrızmnen túsken jalpy tabystyń shamamen 15,6%-yn shetelde turaqty turatyn Túrkııa azamattary qamtamasyz etti.
Ekinshi toqsanda Túrkııaǵa 15,58 mln adam keldi. Bul ótken jyldyń osy kezeńimen salystyrǵanda 5,1%-ǵa az. Soǵan qaramastan, bir týrıstiń bir túnge shaqqandaǵy ortasha shyǵyny 113 AQSh dollaryna deıin ósti.
Elge kelgenderdiń 71,3%-y demalý, oıyn-saýyq jáne mádenı is-sharalarǵa qatysý maqsatynda saparlaǵan. Taǵy 16,6%-y týystary men dostaryna qonaqqa kelgen.
Sonymen qatar Túrkııa turǵyndarynyń shetelge sapar shyǵyndary 7,4%-ǵa ósip, 2,96 mlrd AQSh dollaryna jetti. Shetelge shyqqan azamattar sany 16,5%-ǵa artyp, 3,43 mln adam.
Túrkııanyń Qarjy jáne qazyna mınıstri Mehmet Shımshek geosaıası táýekelderge qaramastan, eldiń jyldyq týrıstik tabysy 65,2 mlrd AQSh dollary deńgeıinde saqtalyp otyrǵanyn aıtty. Onyń sózinshe, úkimet salyqtyq jeńildikter, qarjylandyrý baǵdarlamalary jáne jyl boıǵy týrızmdi damytý sharalary arqyly salany qoldaýdy jalǵastyryp keledi.
Buǵan deıin Túrki memleketteri uıymy keńistiginde elder arasyndaǵy saıahatty jeńildetýge jáne mádenı yntymaqtastyqty kúsheıtýge baǵyttalǵan jańa bastamalar ázirlenip jatqany habarlanǵan bolatyn.
