Túrkııada týrısterge tanymal eSIM-servıster buǵattaldy

ASTANA. KAZINFORM — Túrkııanyń Aqparat jáne kommýnıkatsııa tehnologııalary basqarmasy segiz halyqaralyq eSIM qyzmetine qoljetimdilikti buǵattady, dep habarlaıdy Kazinform agenttigi akdenizmanset.com.tr saıtyna silteme jasap. 

Tyıym salynǵan platformalar qatarynda: Saily, Airalo, Holafly, Nomad, Instabridge, Mobimatter, Alosim jáne BNESIM bar. Bul sheshim tsıfrlyq SIM-kartalardy (eSIM) paıdalanatyn sheteldik týrıster arasynda narazylyq týdyrdy.

Atalǵan servıster jergilikti operatorlarǵa tirkelmeı-aq ınternetke shyǵýǵa múmkindik beretin qoljetimdi balama retinde keń tanymal bolǵan edi. Bul qyzmetter ásirese roýmıngtegi joǵary tarıfterden qashqysy kelgen saıahatshylar úshin tıimdi bolatyn.

Buǵattaý saldarynan endi Túrkııaǵa keletin sheteldik týrıster mobıldi baılanys qyzmetinde shekteýlerge tap bolyp, jergilikti SIM-kartalar men roýmıng úshin kóbirek tóleýge májbúr bolýy múmkin.

Túrkııanyń Aqparat jáne kommýnıkatsııa tehnologııalary basqarmasy ázirge resmı túsinikteme bermegenimen, sarapshylar bul sheshimdi jergilikti baılanys operatorlarynyń múddesin qorǵaýǵa baǵyttalǵan dep boljaıdy.

Aıta keteıik, buǵan deıin Reseıde 1 shildeden bastap bıometrııalyq derekterin tapsyrmaǵan sheteldikter úshin mobıldi baılanysty óshirý bastalatynyn habarlaǵan edik.