Túrkııada týrıster mingen avtobýs pen júk kóligi soqtyǵysyp, 11 adam qaza tapty
ASTANA. KAZINFORM — Túrkııanyń Manısa provıntsııasynda týrıstik avtobýs pen júk kóliginiń soqtyǵysýy saldarynan 11 adam qaza taýyp, taǵy 27 adam jaraqat aldy. Bul týraly Kazinform agenttiginiń Ankaradaǵy menshikti tilshisi habarlady.
Jol apaty «Gebze — Orhangazı — Izmır» avtomagıstraliniń Aqhısar aýdanyna qarasty aqyly jol ótkizý pýnkti mańynda bolǵan. Oqıǵa ornyna jedel járdem brıgadalary, órt sóndirýshiler men polıtsııa qyzmetkerleri jiberildi.
ntv.com.tr basylymynyń málimetinshe, avtobýs Býrsa qalasynan Denızlı provıntsııasyndaǵy Pamýkkale aýdanyna qaraı bet alǵan.
Aldyn ala boljam boıynsha, avtobýs júrgizýshisi qajetti jolaıryqtan ótip ketip, keıin kólikti keri júrgizýge áreket jasaǵan. Osy kezde júk kóligi avtobýstyń artqy jaǵynan soǵylǵan. Qazir apattyń mán-jaıy anyqtalyp jatyr.
Manısa provıntsııasynyń gýbernatory Vahdettın Ózkannyń habarlaýynsha, zardap shekkenderdiń biri aýyr jaǵdaıda jatyr. Qalǵan jaralanǵandar óńirdegi túrli aýrýhanaǵa jetkizilgen.
Jol-kólik oqıǵasyna qatysty prokýratýranyń úılestirýimen tergeý bastaldy.
Apat saldaryn joıý jumystaryna medıtsına jáne qutqarý qyzmetteri, jandarmerııa bólimsheleri men Túrkııanyń tótenshe jaǵdaılar jónindegi basqarmasy (AFAD) qatysty.
Buǵan deıin Túrkııada joldaǵy janjalǵa baılanysty kólikten shyǵýǵa zań júzinde tyıym salynǵany habarlanǵan edi. Jol qozǵalysynyń jańa erejelerine sáıkes, jol ústindegi janjal úshin júrgizýshilerdiń kólik júrgizý quqyǵynan aıyrylýy múmkin.
Eske salaıyq, buǵan deıin Antalıadaǵy qonaqúılerdiń birinde anımator bolyp jumys istegen qazaqstandyq qyz 2026 jylǵy 15 maýsym kúni jol apaty saldarynan qaıtys bolǵanyn habarlaǵanbyz.
