Túrkııada týrıster mingen avtobýs apatqa ushyrap, 4 adam mert boldy
ASTANA. KAZINFORM — Túrkııanyń Isparta provıntsııasynda týrıster mingen avtobýs aýdarylyp, 4 adam kóz jumdy, taǵy 15 jolaýshy jaralandy. Zardap shekkenderdiń úsheýiniń jaǵdaıy aýyr, dep habarlaıdy BELTA.
Jergilikti bıliktiń habarlaýynsha, Isparta-Konıa tas jolymen kele jatqan týrıstik avtobýs júrgizýshisi Gelendost aýdanynda tizginge ıe bola almaı, aýdarylyp qalǵan.
Zardap shekken 15 jolaýshy ártúrli dárejede jaraqat aldy. Zardap shekkenderdiń úsheýiniń jaǵdaıy aýyr, olarǵa medıtsınalyq kómek kórsetilip jatyr.
Buǵan deıin halyqaralyq izdeýdegi qazaqstandyq Túrkııada ustalyp, elge qaıtarylǵany týraly habarlaǵan bolatynbyz.
