Túrkııada túngi klýbqa barǵan: Mektep muǵalimderi dırektoryn sotqa berip, sheshim shyqty
QYZYLORDA. KAZINFORM – Qyzylorda oblysy Qarmaqshy aýdandyq soty Túrkııada túngi klýbqa baryp, jumysynan shyǵyp qalǵan eki muǵalimniń mektep dırektorynyń ústinen bergen talap aryzyn qanaǵattandyrýdan bas tartty.
Qarmaqshy aýdandyq sotynda talap qoıýshylar S. men J.-nyń jaýapkerler M men J-dan, aýdandyq polıtsııa bóliminen moraldyq zııan óndirý týraly azamattyq isi qaraldy.
«Mektep-lıtseı muǵalimderi 2024 jylǵy 9 qańtardan óz ótinishterine baılanysty jumystan bosatylǵan. Talap qoıýshylar sotqa jaýapkerlerdiń is-áreketi saldarynan moraldyq zııan shekkendigin kórsetken. Sol sebepti árqaısysynyń paıdasyna M men J.-nyń árbirinen 3 mln teńgeden, Qarmaqshy aýdanynyń polıtsııa bóliminen 5 mln teńgeden jáne jaýapkerlerden ortaqtasqan túrde 1 mln teńgeden zańgerge ketken shyǵyndy óndirýdi suraǵan. Іs-qujattaryna jáne sotta zerttelgen mán-jaılarǵa qaraǵanda naq osy jaýapkerlerdiń is-áreketinen (áreketsizdikten) talap qoıýshylarǵa qandaı da bir zııan kelgeni anyqtalǵan joq. Talap qoıýshylar óz ótinishterine baılanysty jumystan bosatylǵan», - dep málim etti Qarmaqshy aýdandyq sotynan.
Mektep basshylyǵynyń qysymynan jáne basqa jaýapkerlerdiń áreketinen ózderine zııan kelgenin rastaıtyn dáleldemeni sotqa usyna almaǵan.
«Qarmaqshy aýdandyq sotynyń sheshimimen talap qoıýshylardyń moraldyq zııan óndirý týraly talap qoıý qanaǵattandyrýdan bas tartyldy. Sot sheshimi zańdy kúshine enbegen. Sheshimmen kelispegen tarap, joǵary turǵan saty sotyna shaǵym keltire alady», - dep tolyqtyrdy Qarmaqshy aýdandyq soty.
