Túrkııada tórt jyldan beri halyqaralyq izdeýde júrgen qazaqstandyq ustaldy
ASTANA. KAZINFORM — Soltústik Qazaqstan oblysynyń polıtseıleri 2022 jyldan beri halyqaralyq izdeýde júrgen 30 jastaǵy Qazaqstan Respýblıkasynyń azamatyn Túrkııa Respýblıkasynda ustady.
— Soltústik Qazaqstan oblysy polıtsııa departamenti krımınaldyq polıtsııa basqarmasynyń jáne Qazaqstan Respýblıkasy ІІM krımınaldyq polıtsııa departamentiniń qyzmetkerleri júrgizgen birlesken is-sharalardyń nátıjesinde, Qazaqstan Respýblıkasynyń Antalıa qalasyndaǵy Bas konsýldyǵynyń qoldaýymen 2022 jyldan beri halyqaralyq izdeýde júrgen 30 jastaǵy Qazaqstan Respýblıkasynyń azamaty ustaldy, — dep habarlady polıtsııa.
Tergeý málimetine qaraǵanda, kúdikti 2021 jyldyń tamyzy men qyrkúıegi aralyǵynda sybaılastarymen aldyn ala sóz baılasyp, azamattardyń senimine kirip, 6 mıllıon teńgeden astam qarajatyn alaıaqtyq jolmen ıemdengen.
16 shildede kúdikti Túrkııa Respýblıkasynan Qazaqstan Respýblıkasyna deportatsııalandy. Ony elge qaıtarýǵa Qazaqstan Respýblıkasynyń Antalıa qalasyndaǵy bas konsýldyǵy men Qazaqstan Respýblıkasy Іshki ister mınıstrliginiń qyzmetkerleri kómektesti.
Aıta keteıik, jyl basynan beri Soltústik Qazaqstan oblysynyń polıtseıleri alaıaqtyq jasaǵany úshin izdeýde júrgen tórt adamdy ustady. Qylmystyq ister materıaldaryna sáıkes, olardyń áreketterinen keltirilgen jalpy materıaldyq shyǵyn 568 mıllıon teńge boldy.
Eske salaıyq, buǵan deıin UBT-ǵa daıyndaımyn dep aldaǵan kúdikti Albanııadan Qazaqstanǵa jetkizilgenin habarlaǵanbyz.
