Túrkııada tikushaq aýrýhana ǵımaratyna soqtyǵysty

ASTANA. KAZINFORM — Apat saldarynan eki ushqysh, bir dáriger jáne jedel járdem qyzmetkeri qaza tapty, dep habarlaıdy TRT Haber.

Mýgla qalasy Menteshe aýdanynda ornalasqan Mýgla oqý-zertteý aýrýhanasynan ushyp shyqqan tikushaq Antalıaǵa qaraı baǵyt alǵan. Alaıda ushý barysynda aýrýhananyń tórtinshi qabatyna soqtyǵysyp, jerge qulaǵan.

Apat týraly habarlama taraǵannan keıin oqıǵa ornyna kóptegen órt sóndirýshi, medıtsına qyzmetkeri, polıtsııa jáne qutqarýshylar bardy.

Mýgla gýbernatory Idrıs Akbııık birden qaıǵyly oqıǵa bolǵan jerge baryp, jýrnalısterge túsinikteme berdi. Onyń sózinshe, apat saldarynan tikushaqta bolǵan eki ushqysh, bir dáriger jáne jedel járdem qyzmetkeri qaza tapqan.

Akbııık atap ótkendeı, aýdandy búgin qalyń tuman basqan. Qazir apat sebepteri anyqtalyp jatyr. Ol aýrýhana qıramaǵanyn aıtty.

Osy apatqa baılanysty qylmystyq is qozǵaldy.

Al eldiń densaýlyq saqtaý mınıstri áleýmettik jelide oqıǵaǵa qatysty pikir bildirip, qaza bolǵandardyń otbasylaryna kóńil aıtty.

— Bizdiń mınıstrliktiń qaramaǵyndaǵy jedel járdem tikushaǵy Mýgla oqý-zertteý aýrýhanasyna soqtyǵysyp, jerge qulady. Apat saldarynan bizdiń tórt áriptesimiz, onyń ishinde eki ushqysh, bir dáriger jáne medıtsına qyzmetkeri qaza tapty. Biz olardyń otbasyna kóńil aıtamyz. Oqıǵany tergeý jalǵasýda, tıisti aqparat jarııa etiledi, — dedi ol.

Eske salsaq, buǵan deıin Túrkııanyń Býrsa qalasynda qarýly adam sot ǵımaratynda oq jaýdyrǵany habarlandy.