Túrkııada terakt boldy
ANKARA. KAZINFORM – Túrkııanyń Ankara qalasynda áskerı ushaqtar men ǵarysh tehnıkasyn shyǵaratyn «TUSAŞ» korporatsııasy ǵımaratynyń janynda terakt boldy. Bul týraly IHA agenttigi habarlady.
Búgin, 23 qazanda Ankaranyń Kahramankazan aýdanyndaǵy Túrik aeroǵarysh ónerkásibi (TAI) nysandaryna lańkestik áreket jasaldy. Obektter aldynda atys pen jarylystar estilgen.
Bul jaǵdaıǵa baılanysty Іshki ister mınıstri Alı Erlıkaıa málimdeme jasady.
– Ankaranyń Kahramankazan nysandaryna terakt jasaldy. Ókinishke oraı, qurban bolǵandar men jaralanǵandar bar. Alla rahymyna alsyn, – dedi mınıstr.
Málimdemede qurbandar men jaralanǵandardyń naqty sany aıtylmady.
Lańkestik áreketten keıin oqıǵa ornyna jedel járdem, órt sóndirý qyzmeti jáne qaýipsizdik toby kelgen.