Túrkııada temirjol apatynan qaza tapqandar sany 24-ke jetti

ASTANA. QazAqparat - Túrkııa batysyndaǵy Tekırdag provıntsııasynda jolaýshy poıyzynyń aýdarylýy saldarynan qaza tapqandar sany 24-ke jetti, dep habarlaıdy «Anadoly» agenttigi.

Túrkııa vıtse-premeri Redjep Akdag oqıǵa ornyndaǵy izdestirý-qutqarý isteri 9 shilde kúni tańerteń 06:00-de aıaqtalǵanyn málimdedi.

Sheneýnik oqıǵanyń sebepteri egjeı-tegjeıli tekserilip jatqanyn jetkizdi.

Densaýlyq mınıstri Ahmet Demırdjannyń aıtýynsha, 318 jolaýshy aýrýhanaǵa jetkizilgen, sonyń 124-i turaqty emdelip jatyr.

Eske sala keteıik, keshe túnde Túrkııanyń Tekırdag provıntsııasynyń Chorlý aýdanynda Kapıkýle-Ystanbul baǵdaryndaǵy, 362 jolaýshysy, 6 temirjol qyzmetkeri bar poıyzdyń relsten shyǵyp ketkenin habarlaǵan bolatynbyz.

Eldiń Kólik mınıstrliginiń málimetinshe, oqıǵa jaýyn-shashynnan topyraqtyń jumsarýynan bolǵan.