Túrkııada temeki satatyn dúkenderde jańa talap engizilýi múmkin
ASTANA. KAZINFORM — Túrkııa bıligi jeke derekterdi qorǵaý talaptaryn eskere otyryp, temeki satyp alýshylardyń jasyn tekserýdiń túrli tásilderin qarastyryp jatyr. Bul týraly Kazinform agenttiginiń Túrkııanyń Ankara qalasyndaǵy menshikti tilshisi habarlaıdy.
Túrkııanyń Densaýlyq saqtaý mınıstri Kemal Memıshoglý temeki satý kezinde jeke kýálikti mindetti túrde tekserý týraly bastamaǵa qatysty syn-pikirlerge jaýap berdi.
Onyń aıtýynsha, jańa sharanyń negizgi maqsaty — 18 jasqa tolmaǵandarǵa temeki ónimderiniń satylýyna jol bermeý jáne jasóspirimderdi nıkotınniń zııandy áserinen qorǵaý.
Mınıstr bılik azamattardyń jeke derekterdiń qupııalylyǵyna qatysty alańdaýshylyǵyn túsinetinin atap ótti. Osyǵan baılanysty jeke aqparattyń qorǵalýyn jáne paıdalanýdyń qolaılylyǵyn qamtamasyz etetin elektrondyq júıelerdi qosa alǵanda, adamnyń jasyn tekserýdiń túrli nusqalary qarastyrylyp jatyr.
— Sonymen qatar el úkimeti temeki shekpeıtin azamattardyń taza aýamen tynystaý quqyǵyn qorǵaý jáne qoǵamdyq oryndarda temeki shegýge baılanysty máselelerdi sheshý sharalaryn da qolǵa alyp jatyr, — dep atap ótti Memıshoglý.
Buǵan deıin mınıstr temeki satý kezinde jeke basty kýálandyratyn qujattardy mindetti túrde tekserýdi jáne belgilengen shekteýlerdiń saqtalýyn baqylaýdy kúsheıtýdi kózdeıtin zań jobasy ázirlenip jatqanyn habarlaǵan bolatyn. Qarastyrylyp jatqan sharalardyń qatarynda saıabaqtar men baqtarda temeki shegýge qosymsha shekteýler engizý, sondaı-aq temeki ónimderiniń qoljetimdiligin tómendetý bar.
Buǵan deıin Túrkııa bıligi temeki shegýge qarsy álemdegi eń qatań zańdardyń birin talqylap jatqanyn jazǵanbyz. Ol temeki shegýge birtindep tyıym salý jáne 2040 jylǵa qaraı temeki ónimderine tolyq tyıym salýmen baılanysty.
