Túrkııada tehnologııa festıvaline rekordtyq 1,5 mln adam jınaldy
ASTANA. KAZINFORM — Túrkııanyń Shanlyýrfa qalasynda avıatsııa, ǵarysh jáne tehnologııalar salasyndaǵy TEKNOFEST Güneydoğu («Ońtústik-shyǵys») festıvali jabylý saltanatymen aıaqtaldy, dep habarlaıdy Anadoly.
T3 qorynyń Qamqorshylyq keńesi tóraǵasy, TEKNOFEST dırektorlar keńesiniń tóraǵasy Selchýk Baıraktar festıval sharalaryna 1,5 mıllıonnan astam adam qatysqanyn aıtty. Bul — festıval tarıhyndaǵy rekordtyq kórsetkish. Onyń aıtýynsha, Shanlyýrfanyń ózinde sharaǵa 1,3 mıllıon adam kelgen.
— Biz taǵy da Túrkııanyń bolashaǵyna degen senimniń kýási boldyq. Bul jerden keterde biz ózimizben birge tek kýboktar, júldeler men marapattardy ǵana emes, dostyqty, jańa ıdeıalardy jáne jyldar óte úlken jetistikterge aınalatyn armandarǵa bastar alǵashqy qadamdardy da alyp ketemiz, — dedi Baıraktar.
Ol jastardyń jasandy ıntellekt, aýyl sharýashylyǵy, robot tehnıkasy jáne avtonomdy júıeler salalaryndaǵy jobalaryn tanystyrǵanyn atap ótti.
— Munda biz tek tehnologııa salasynda ǵana jarysqan joqpyz. Sizderdiń jobalaryńyzdan Túrkııanyń óz kúshine degen senimin kórdik. «Sender isteı almaısyńdar» degenderge qaramastan, biz jasadyq, jasap jatyrmyz jáne bárinen de jaqsy jasaıtyn bolamyz, — dedi TEKNOFEST basshysy.
Baıraktardyń aıtýynsha, TEKNOFEST-tiń maqsaty — jastardyń tehnologııalyq jetistikterin qoldap qana qoımaı, olardyń óz kúshine degen senimin nyǵaıtý.
Álemdegi eń iri avıatsııa, ǵarysh jáne tehnologııalar festıvali sanalatyn TEKNOFEST bıyl 15-ret kelýshilerge esigin ashty.
Festıval Túrkııanyń Ónerkásip jáne tehnologııalar mınıstrligi, T3 qory jáne Savunma Teknolojileri Mühendislik ve Ticaret A.Ş. kompanııasynyń uıymdastyrýymen Shanlyýrfa GAP áýejaıynyń aýmaǵynda ótti.
Festıval aıasynda túrli demonstratsııalyq sharalar, kórmeler jáne tehnologııalyq baıqaýlardyń 14 sanaty boıynsha fınaldyq kezeńder uıymdastyryldy.
Budan buryn Túrkııa bıligi týrıstik belsendilikti eldiń barlyq tórt maýsymyna jáne barlyq óńirine taratý josparlap otyrǵanyn jazǵanbyz.
