Túrkııada taǵy 5,3 baldyq zilzala tirkeldi

ASTANA. Anadoly -QazAqparat – Túrkııanyń Adyıaman provıntsııasynda magnıtýdasy 5,3 bolatyn jer silkinisi tirkeldi, dep habarlaıdy QazAqparat Anadoly agenttigine silteme jasap.

Silkinis epıtsentri Gólbashy aýdanynda bolǵan, oshaq 8,13 km tereńdikte jatqan.

«Túrkııanyń ońtústik-shyǵysyndaǵy Adyıaman provıntsııasynda 5,3 balldyq jer silkinisi boldy. Bul týraly seısenbi, 7 aqpanda Túrkııa úkimeti janyndaǵy tótenshe jaǵdaılardyń aldyn alý jáne joıý jónindegi Túrkııa basqarmasy (AFAD) habarlady. Dúmpýler jergilikti ýaqyt boıynsha tańǵy 06.13-te tirkeldi», - dep jazylǵan Anadoly saıtynda.

Aıta keteıik, Qazaqstan Tótenshe jaǵdaılar mınıstrliginiń qutqarýshylary jer silkinisi saldaryn joıýǵa kómek kórsetý úshin Almatydan Túrkııaǵa attandy.

Onyń quramynda Qazaqstannyń respýblıkalyq jedel qutqarý jasaǵynyń qutqarýshylary, medıtsınalyq qyzmetkerler jáne qutqarýshy ıtter bar.

Tıisti tapsyrmany Qazaqstan Prezıdenti Qasym-Jomart Toqaev berdi. Bort birinshi kezekte Gazıantep qalasyna barady.

Sońǵy málimet boıynsha, Túrkııada zilzala qurbandarynyń sany 3 myńǵa jetti.

Túrkııa Prezıdenti Rejep Taıyp Erdoǵan eldiń ońtústik-shyǵysynda bolǵan joıqyn jer silkinisine baılanysty 12 aqpanǵa deıin jeti kúndik ulttyq aza tutý jarııalady.

Foto: aa.com.tr