Túrkııada strategııalyq mamandyq boıynsha 550 doktorant bilim alady
ASTANA. KAZINFORM – Túrkııa 20 zertteý ýnıversıtetinde negizgi tehnologııalyq baǵyttar boıynsha oqytý úshin 550 doktorantty tańdaıdy, dep habarlaıdy Kazinform agenttiginiń Ankaradaǵy menshikti tilshisi.
Túrkııa prezıdenti Rejep Taııp Erdoǵan strategııalyq tehnologııalar salasynda mamandar daıarlaýdyń jańa baǵdarlamasynyń bastalǵany týraly jarııalady. Onyń aıtýynsha, bastapqyda 550 doktorant ortalyqtandyrylǵan emtıhan arqyly tańdalyp, el boıynsha 20 zertteý ýnıversıtetine oqýǵa jiberiledi.
Baǵdarlama jasandy ıntellekt, kıberqaýipsizdik, chıp tehnologııalary jáne ozyq kompıýterlik júıeler sııaqty salalardy qamtıdy. El bıligi bes jyl ishinde ulttyq ǵylym jáne tehnologııa ekojúıesine 3 myń jas zertteýshini tartýǵa úmittenip otyr.
- Biz ǵylym, tehnologııa jáne jastarymyzdyń kúshimen «Túrik ǵasyryn» quramyz, - dep málimdedi Erdoǵan.
Bul rette ol maqsat – bolashaq tehnologııalaryn damytyp, óndire alatyn kúshti, gúldengen jáne tolyqtaı táýelsiz Túrkııa qurý ekenin atap ótti.
Túrkııa búginde óziniń joǵary tehnologııalyq salalaryn damytýǵa jáne sheteldik óndirýshilerge, ásirese jartylaı ótkizgishter ónerkásibine táýeldiligin azaıtýǵa kúsh salyp otyr.
Osyǵan deıin Túrkııa ǵaryshqa aı apparatyn ushyrýdy josparlap otyrǵanyn habarladyq.
