Túrkııada sottalǵan qazaqstandyqtardyń óz otanynda jazasyn óteýine múmkindik týdy
ASTANA. 7 qarasha. QazAqparat - Búgin QR Parlamenti Senaty «Qazaqstan Respýblıkasy men Túrkııa Respýblıkasy arasyndaǵy sottalǵan tulǵalardy berý týraly kelisimdi ratıfıkatsııalaý týraly» QR Zańynyń jobasyn maquldady.
«Sizderdiń nazarlaryńyzǵa usynylyp otyrǵan kelisimge osydan 3 aı buryn QR Bas prokýrorynyń Ankaraǵa sapary aıasynda qol qoıylǵan. Ol Túrkııada sottalǵan bizdiń azamattarǵa otanynda jazasyn óteýge múmkindik beredi. Máselen, qazirgi ýaqytta Túrkııa túrmelerinde Qazaqstannyń 2 azamaty jazasyn óteýde. Atap aıtqanda, Rústem Mamaev 5 jylǵa, Dmıtrıı Maleev 12,5 jylǵa sottalǵan. Qaralyp otyrǵan kelisim ratıfıkatsııalanǵan jaǵdaıda bul azamattardy Qazaqstanǵa qaıtarý múmkindigi týady. Mundaı jaıt Qazaqstanda jazasyn ótep jatqan Túrkııanyń 3 azamatyna da múmkindik beredi», - dedi QR Bas prokýrorynyń orynbasary Jaqyp Asanov.
