Túrkııada sot jumystan tys ýaqytta WhatsApp arqyly berilgen tapsyrmany artyq jumys dep tanydy
ASTANA. KAZINFORM — Ystanbul apellıatsııalyq soty jumys ýaqytynan keıin WhatsApp arqyly jiberilgen qyzmettik tapsyrmalar artyq jumys ýaqyty retinde eseptelýi múmkin degen sheshim shyǵardy. Bul týraly Kazinform agenttiginiń Ankaradaǵy menshikti tilshisi habarlady.
Túrkııanyń Evrensel basylymynyń málimetinshe, Ystanbul óńirlik apellıatsııalyq sotynyń 31-alqasy eńbek quqyǵyna qatysty mańyzdy sheshim qabyldaǵan.
Sot jumys kúni aıaqtalǵannan keıin qyzmetkerge WhatsApp arqyly joldanǵan tapsyrmalardy eńbek protsesiniń bir bóligi dep tanydy.
Sondyqtan mundaı baılanys artyq jumys ýaqyty retinde eseptelýi múmkin.
Sot sheshiminde birneshe faktor negizgi dálel retinde kórsetilgen.
Atap aıtqanda, habarlamalardyń qyzmettik tapsyrma sıpatynda bolýy, jumys ýaqytynan tys kezde turaqty túrde tapsyrma berilýi jáne qyzmetkerdiń únemi baılanysta bolýǵa májbúr bolýy eskerilgen.
Zańgerler sońǵy jyldary eńbek daýlarynda tsıfrlyq baılanys quraldary dálel retinde jıi qoldanylyp jatqanyn aıtady.
Sottarda WhatsApp hat almasýlary, Microsoft Teams júıesindegi tapsyrmalar, elektrondyq hattar jáne korporatıvtik júıelerge kirý-shyǵý derekteri qaralady.
Túrkııanyń eńbek zańnamasyna sáıkes, aptasyna 45 saǵattan asatyn jumys ýaqyty artyq jumys bolyp sanalady.
Mundaı eńbekke ádettegi saǵattyq tólemnen 50 paıyz joǵary aqy tólenýi tıis.
Sarapshylardyń pikirinshe, bul sheshim qyzmetkerlerdiń jumystan tys ýaqytta «baılanystan ajyratylý quqyǵyna» qatysty talqylaýdy kúsheıtýi múmkin.
Qazir Eýropanyń birqatar elinde jumys kúni aıaqtalǵannan keıin qyzmetkerdiń jumys habarlamalary men qońyraýlaryna jaýap berý mindetin shekteıtin normalar qoldanylady.
Osyǵan deıin Qazaqstan men Túrkııa arasyndaǵy bilim, medıtsına jáne ınvestıtsııalyq baılanys kúsheıip kele jaqany týraly jazdyq.
