Túrkııada shylym shegetin memlekettik qyzmetkerlerdiń jumys ýaqyty uzartylýy múmkin

ASTANA. KAZINFORM – Túrkııanyń Uly Ulttyq Májilisine (Parlament) shylym shegetin memlekettik qyzmetshiler úshin jumys ýaqytyn arttyrýdy usynǵan petıtsııa kelip tústi, dep habarlaıdy Kazinform agenttiginiń menshikti tilshisi. 

Qujatty usynýshylardyń pikirinshe, mundaı qyzmetkerler jumys ýaqytynda jıi shylym shegý men túrik shaıyn ishý úshin úzilis jasap, óz mindetterin tolyq kólemde oryndamaıdy. Sondyqtan olar bul ýaqytty qosymsha jumys isteý arqyly óteýi tıis dep sanaıdy.

Bastamanyń avtorlary bul sharany shylym shekpeıtin qyzmetkerlerge ádildik ornatý quraly retinde qarastyrady. Olar jumys ýaqytyn tolyqtaı jumys ornynda ótkizip, eshteńege alańdamaıdy.

Usynys áli qaralyp jatqanymen, bul bastama qoǵam men memlekettik qyzmetkerler arasynda qyzý pikirtalas týdyrdy.

Qoǵamda bul usynys tek zańdy turǵydan ǵana emes, sonymen qatar qyzmetkerlerdiń jeke erkindigine qol suǵý máselesin de týyndatyp otyr.

Sarapshylardyń keıbiri mundaı shekteý sharalarynan góri, adamdardy shylym shegýden bas tartýǵa yntalandyratyn mehanızmderdi engizý áldeqaıda tıimdi bolar edi dep esepteıdi.

Aıta keteıik, sońǵy Eurostat derekterine sáıkes, Túrkııa Eýropada jumys aptasynyń uzaqtyǵy boıynsha birinshi orynǵa shyqqan.

Sondaı-aq, Túrkııadaǵy óndiristik kompanııalardyń biri jaqynda 4 kúndik jumys aptasyn resmı túrde engizgen. Bul sheshim qyzmetkerlerdiń jumys pen jeke ómir arasyndaǵy tepe-teńdigin jaqsartyp, jumysqa degen yntasynyń deńgeıin 85%-ǵa deıin arttyrǵan.

Aıta ketelik Túrkııada qarjylyq qıyndyqtar «Akkýıý» AES-niń jańa bloktaryn salý qarqynyn báseńdetken edi.