Túrkııada sheteldikterdiń turaqty turýyna beriletin ruqsat quny qymbattady
ASTANA. KAZINFORM — Túrkııada shetel azamattaryna elde turaqty turýǵa ruqsat rásimdeý úshin alynatyn memlekettik alymdar ulǵaıtyldy, dep habarlaıdy Kazinform agenttiginiń Ankaradaǵy menshikti tilshisi.
Túrkııa bıligi eldegi kóshi-qon aǵyndaryn retteý úshin zańdy túrde turýǵa beriletin ruqsat — «túrkııalyq ıkamet» (ikamet) qunyn qymbattatty. Endi shetel azamattary elde turýǵa ruqsat alý úshin burynǵydan kóbirek aqsha tóleıdi. Keı sanattar boıynsha ósim shamamen 1000 paıyzǵa deıin jetedi.
Buǵan deıin qazaqstandyqtar úshin bir jyldyq ruqsat quny shamamen 40 myń teńgeni qurasa, qazir 300 myń teńgeden asty. Stýdentterge ádette jeńildikter qarastyrylǵan.
Jańa tarıfter ruqsat merzimine baılanysty belgilengen jáne qazirdiń ózinde kúshine endi.
Jańartylǵan málimetke sáıkes, Túrkııada elde turý ruqsatyn rásimdeý quny:
– 1 jylǵa — 31 111,50 túrik lırasy (shamamen 327 myń teńge);
– 2 jylǵa — 57 899,10 túrik lırasy (shamamen 608 myń teńge);
– 3 jylǵa — 84 686,70 túrik lırasy (shamamen 890 myń teńge).
Kórsetilgen somaǵa sheteldikke arnalǵan jeke kýálik kartasyn daıyndaý quny kiredi.
Sonymen qatar, ruqsatty alǵash ret rásimdeıtin jáne vızasyz rejımmen kelgen elderdiń azamattary úshin 9 376 túrik lırasy (shamamen 98,5 myń teńge) kóleminde vızalyq alym alynýy múmkin.
Osyǵan deıin 2023 jyldyń basynan bastap Túrkııada uzaq ýaqyt bolýdy kózdeıtin shetel azamattaryna ruqsat rásimdeý talaptary ózgergeni habarlanǵan bolatyn.
Sondaı-aq Túrkııada áleýmettik jeliler men oıyn platformalaryna jas shekteýi engizildi.
