Túrkııada shahtada qaza bolǵandar sany 282 adamǵa jetti
ASTANA. QazAqparat - Túrkııanyń Energetıka jáne tabıǵı resýrstar mınıstri Taner Iyldyz Somadaǵy kómir shahtasynda qaza bolǵandardyń sany 282 adamǵa jetkenin habarlaıdy.
Qazir apat bolǵan jerde Densaýlyq saqtaý men Otbasy jáne áleýmettik saıasat mınıstrleri oqıǵany tikeleı baqylaýǵa aldy. Al 500 adamnan turatyn qutqarý qyzmeti táýlik boıy shahta ishinde qutqarý-izdestirý jumystaryn júrgizýde, dep jazady 24 kz.
Kúni keshe Manısa qalasyna Úkimet jetekshisi Taıyp Erdoǵan kelip, marqum bolǵandardyń otbasylarymen kezdesip, kóńil aıtqan edi. Búgin oqıǵa ortasyna el Prezıdenti Abdýlla Gúl keldi. Ol áýeli jergilikti aýrhanalarǵa túsken jaraly kenshilerdiń hal-jaǵdaıyn surap, memleket tarapynan barlyq járdem beriletinin aıtty. Qazir aýrýhanalarda 80-nen astam ártúrli deńgeıde jaraqat alǵan kenshilerge medıtsınalyq kómek kórsetilip jatyr. Al 100-den astam adam qazir tereń shahtanyń ishinde. Túrkııada Somadaǵy apatqa búkil halyq qaıǵyryp jatyr. Adamdar ortaq qasiretke ózderinshe ún qatýda. Mysaly Erzýrým qalasynda qant zaýytynyń jumysshylary men Chanakkaleniń qurylysshylary marqum bolǵandardyń rýhyna quran baǵyshtap, bir kúndik jumystaryn toqtatty. Qazir apat oryn alǵan Manısa qalasynda qaıtys bolǵan kenshilerdi jer qoınyna tapsyrýda. Qalanyń shetinen beıit úshin 5 myń sharshy metr jer bólinip, qala ákimshiligi jergilikti turǵyndardyń kómegimen 80 adamdyq qabir qazdy. Manısada marqumnyń týystary janaza rásimin ótkizip jatsa, Túrkııanyń ózge aımaqtarynda stýdent jastardyń qatysýymen narazylyq sherýler ótýde. Izmırlik jastar qalanyń ortalyǵyna shyǵyp, tártip saqshylarymen tikeleı qaqtyǵysqa túsýde. Mundaı sherý Ankara, Ystambul men eldiń ózge óńirlerinde de kórinis tapqanyn aıta ketý kerek.
