Túrkııada sapasyz ónimderdi tutyný qaýpi týraly eskertildi
ASTANA. KAZINFORM – Túrkııada qasıetti Ramazan aıynda eń qajetti azyq-túlik ónimderin tańdaǵanda jáne satyp alarda saqtyq sharalaryn saqtaý kerek, dep habarlaıdy Kazinform menshikti tilshisi.
Túrik qolónershiler men saýdagerler konfederatsııasynyń (TESK) tóraǵasy Bendevı Palandeken qaýipsizdik standarttaryna sáıkes kelmeıtin, sertıfıkaty joq azyq-túlik ónimderin tutyný qaýpiniń artýyna baılanysty alańdaýshylyq bildirdi.
Bul turǵyda ol ásirese Ramazan aıynda arnaıy ónimderge suranys joǵary bolǵan kezde ony tańdaý kezinde muqııat bolý mańyzdy ekenin atap ótti.
Palandekenniń atap ótýinshe, Ramazan aıynda bazarlar men ınternette satylatyn táttiler, kondıterlik ónimder, irimshik, záıtún, et ónimderi, shujyq pen qaqtalǵan shujyq kólemi artty. Bul rette tartymdy baǵa men syrtqy túri ónimniń qaýipsizdigine árqashan kepildik bermeıtinin este ustaǵan jón. Ásirese jol jıeginde nemese kúmándi ınternet-dúkenderde satylatyn keıbir ónimder qoldan jasalaýy nemese sanıtarlyq normalarǵa sáıkes kelmeýi múmkin.
Ol tutynýshylardy abaı bolýǵa jáne arzan ári sertıfıkaty joq ónimderdi satyp alýdan aýlaq bolýǵa shaqyryp, keı jaǵdaılarda óndirýshiler qaýipti ónimderdi «tabıǵı» nemese «ekologııalyq taza» dep kórsetýge tyrysatynyn atap ótti. Densaýlyqty qorǵaý úshin Palandeken naryqta ózin tanytqan jáne barlyq qajetti sapa sertıfıkattary bar senimdi satýshylar men brendterge júginýdi keńes etti.
TESK sarapshylary azyq-túlik qaýipsizdigi standarttaryn saqtaý adamdar men olardyń densaýlyǵy úshin ǵana emes, sonymen qatar saýda jelileri men óndirýshilerdiń bedelin saqtaý úshin de mańyzdy ekenin eske saldy.
Aqpan aıynda Senattyń jalpy otyrysynda «Qazaqstan Úkimeti men Túrkııa Úkimeti arasyndaǵy ósimdikter karantıni jáne olardy qorǵaý salasyndaǵy yntymaqtastyq týraly kelisimdi ratıfıkatsııalaý týraly» zańy maquldandy.
Buǵan deıin Qazaqstan Túrkııaǵa et jetkizetinin jazǵan bolatynbyz.