Túrkııada S-70 tikushaǵy apatqa ushyrap, tórt áskerı qyzmetker qaza tapty
ASTANA. KAZINFORM — Túrkııanyń ońtústik-shyǵysyndaǵy Malatıa provıntsııasynda 12 qarashada S-70 áskerı tikushaǵy apatqa ushyrady. Saldarynan borttaǵy tórt áskerı qyzmetker qaza tapty. Bul týraly TASS agenttigi habarlady.
— S-70 tikushaǵy ázirge belgisiz sebeppen Malatıa provıntsııasynda apatqa ushyrady. Borttaǵy tórt áskerı qyzmetkerimiz qaza tapty, – dep habarlady Túrkııa Qorǵanys mınıstrligi.
TRT Haber telearnasynyń málimetinshe, apat Túrkııa Áýe kúshteri qolbasshylyǵynyń bazasyna jaqyn jerde bolǵan. Tikushaq qulaǵannan keıin jarylys tirkelgen. Apat bolǵan aýmaqta turǵyn úıler joq.
S-70 (Sikorsky S-70, Black Hawk) – Túrkııa armııasynyń qarý-jaraǵynda turǵan kóp maqsatty áskerı tikushaq.
Eske salaıyq, buǵan deıin AQSh-tyń Florıda shtatyndaǵy Palm-Bıch qalasynda ushaq kóshelerdiń birine qulaǵany habarlanǵan bolatyn.
