Túrkııada Rejep Erdoǵannyń qatysýymen Palestınany qoldaý mıtıngi ótýde
Ystanbulda birneshe jyl buryn jabylǵan Atatúrik áýejaıy aýmaǵynda kóptegen adamnyń qatysýymen Palestınany qoldaýǵa baǵyttalǵan sanktsııalanǵan aýqymdy mıtıng ótýde, dep habarlaıdy Kazinform tilshisi.
Buǵan deıin Túrkııa prezıdenti Rejep Taııp Erdoǵan eldiń barlyq azamattaryn Palestınany qoldaý mıtıngine qatysýǵa shaqyrǵan bolatyn.
«Ultymyzdyń árbir ókilin búkil álemge palestınalyq baýyrlarymyzben yntymaqtastyqty kórsetý úshin «Úlken Palestına mıtıngine» shaqyramyn», – dedi R.Erdoǵan.
Sonymen qatar Túrkııa birneshe elderdiń basshylaryn Palestınany qoldaý mıtıngisine shaqyrǵan. Bul aktsııaǵa Saýd Arabııasy, Mysyr, Lıvııa, Lıvan jáne Iordanııa basshylary shaqyrylǵany aıtylýda.
El bıligi uıymdastyrǵan Izraıldiń Gaza sektoryndaǵy áreketterine qarsy manıfeske Túrkııanyń joǵary laýazymdy tulǵalary, sheneýnikteri men iri kásipkerleri qatysyp jatyr.
Rejep Taııp Erdoǵan jubaıy Emıne Erdoǵanmen birge ondaǵan myń azamat aldynda sóz sóıledi. Mıtıng Quran súrelerin oqýdan bastalyp, saıasatkerlerdiń málimdemelerine ulasty.
Óz sózinde Túrkııa basshysy álemdik qaýymdastyqty Taıaý Shyǵys aımaǵynda birlesken kúsh-jiger jumsaýǵa shaqyrdy. Áıtpese onyń aıtýynsha, barlyǵy birinen soń biri Palestınanyń taǵdyryn qaıtalaıdy.
«Izraıldiń bul aımaqtaǵy «peshka» ekenin bári biledi, ony ýaqyty kelgende qurban etýge bolady. Gaza sektoryndaǵy qyrǵyn – tolyǵymen Batystyń isi», – deıdi Erdoǵan.
Osy ýaqytqa deıin Túrkııanyń túkpir-túkpirinen Ystanbulǵa Palestına jáne Túrkııa týyn ustaǵan adamdar kelip jatyr. Bıliktiń aıtýynsha, mıtıngige 1,5 mıllıonǵa jýyq adam qatysyp jatyr. Qatysýshylar plakattar men bannerlerdi ustaǵan jáne kóptegen adamdar Izraılge qarsy urandar aıtýda.
Osyǵan baılanysty qala boıynsha qaýipsizdik sharalary kúsheıtildi. Ystanbul bıligi kólik qozǵalysynyń jumysyna túzetýler engizdi, al burynǵy áýejaıǵa bet alǵan megapolıs turǵyndary men qonaqtary úshin qoǵamdyq kólik – tegin.
Mıtınginiń aýqymy men oǵan qatysatyn adam sanyna qaraǵanda, bul – Palestınany qoldaý boıynsha ótken álemdegi eń aýqymdy aktsııa.
Eske salaıyq, 7 qazanda Palestınadaǵy HAMAS toby Izraılge shabýyl jasap, elder soǵys jaǵdaıyna kóshken bolatyn.
