Túrkııada iri jol apaty boldy: qaza tapqandar bar

ASTANA. KAZINFORM — Oqıǵa Túrkııanyń Chanakkale provıntsııasynda boldy. Kazinform agenttiginiń menshikti tilshisiniń habarlaýynsha, jolaýshylar avtobýsy, aǵash tıegen júk kóligi jáne jeńil kólik soqtyǵysyp, jol-kólik oqıǵasy tirkeldi.

Oqıǵa Chanakkale–Ezıne avtojolynda boldy. Aldyn ala málimetter boıynsha, otyn tıegen júk kóligi aýdarylyp, qarsy jolaqqa shyǵyp ketken. Sol jerde ol jolaýshylar avtobýsy men jeńil kólikpen soqtyǵysqan. Apat saldarynan 8 adam qaza taýyp, taǵy 20 adam ártúrli deńgeıde jaraqat alǵan.

Oqıǵa ornyna jedel túrde jedel járdem, órt sóndirýshiler, jandarmerııa jáne polıtsııa qyzmetkerleri kelip jetti.

Chanakkale provıntsııasynyń gýbernatory Ómer Toramannyń aıtýynsha, júk kóliginiń júrgizýshisi oqıǵa ornynda kóz jumǵan. Avtobýsta 25 adam bolǵan, sonyń ishinde úsh ekıpaj múshesi. Bes jolaýshy oqıǵa ornynda qaza bolǵan, taǵy úsheýi aýrýhanada kóz jumdy. Birneshe adamnyń jaǵdaıy aýyr dep baǵalanyp otyr.

Túrkııanyń ádilet mınıstri Iylmaz Týnch qaza tapqandardyń otbasyna kóńil aıtyp, jaralanǵandarǵa tezirek saýyǵyp ketýin tiledi. Sondaı-aq ol bul istiń muqııat tergeletinin aıtty.

Jol qozǵalysy ýaqytsha toqtatylyp, keıin balama baǵyttar arqyly qaıta ashyldy. Qaıǵyly oqıǵa boıynsha Ezıne qalasynyń prokýratýrasy tergeý júrgizip jatyr. Eki prokýror oqıǵanyń sebepterin anyqtaýmen aınalysyp jatyr.

Aıta keteıik, Túrkııada jol-kólik oqıǵalarynan bolatyn ólim-jitimdi azaıtý maqsatynda jazany qataıtý, qaýipsizdik standarttaryn arttyrý jáne júrgizýshilerge arnalǵan bilim berý baǵdarlamalary qolǵa alynyp jatyr.

Degenmen, Túrkııa joldarynda jolaýshylar avtobýstary men júk kólikteri qatysqan apattar jıi kezdesedi. Osyndaı oqıǵalardyń biri buǵan deıin Denızlı provıntsııasyndaǵy Saraıkeı qalasynda tirkelgen bolatyn.

Aıta ketelik Túrkııanyń batysynda 4,5 baldyq jer silkinisi bolǵan edi.