Túrkııada iri dinı qaýymdastyq jetekshisiniń aǵasynan 200 keli altyn anyqtaldy
ASTANA. KAZINFORM – Túrkııadaǵy «Súleımandjılar» dinı qaýymdastyǵyna qatysty tergeý aıasynda kóp mólsherde altyn men qolma-qol aqsha tárkilendi, dep habarlaıdy Kazinform agenttiginiń Ankaradaǵy menshikti tilshisi.
«Súleımandjılar» (súleımenshiler) – teolog Súleımen Hılmı Týnahannyń ilimderimen baılanysty túriktiń iri dinı qaýymdastyǵy. Uıym eldegi dinı bilim berý mekemeleri men jataqhanalar jelisimen tanymal.
Alaıda Túrkııadaǵy «Súleımandjılar» dinı qozǵalysyna qatysty tergeý jáne aýqymdy arnaıy operatsııa iri kólemdegi qarjylyq qylmystar, alaıaqtyq jáne uıymdasqan qylmystyq top qurý kúdikterine baılanysty júrgizilip jatyr.
Altyn qaýymdastyq jetekshisi Álıhan Kýrıshtiń aǵasy Hılmı Týna Kýrıshpen baılanysty mekenjaıda tintý kezinde tabyldy. Hılmı Týna Kýrıshtiń ózine izdeý jarııalandy.
Túrkııanyń quqyq qorǵaý organdarynyń málimetinshe, tabylǵan altynnyń quny 1,34 mlrd túrik lırasyna baǵalanyp otyr – bul 30 mln dollardan asady. Tergeýshiler altyn quımalarynyń shyǵý tegin anyqtap, uıymnyń qarjylyq aǵynyn tekserip jatyr.
Tergeýdi Ankara polıtsııasy prokýratýranyń úılestirýimen júrgizip jatyr. Atalǵan is aıasynda barlyǵy 38 adam ustaldy, olardyń 32-si qamaýǵa alyndy, al taǵy altaýy sot baqylaýynda.
Osyǵan deıin Túrkııada DAISh-pen (Qazaqstan Respýblıkasynda tyıym salynǵan uıym — red.) baılanysy bar degen kúdikpen 104 adam ustalǵanyn habarladyq.
