Túrkııada iri banknottar shyǵarý keıinge shegerildi

ASTANA.KAZINFORM — Túrkııanyń Ortalyq banki iri nomınaldar shyǵarýǵa asyqpaıdy. Elde qazir qolma-qol aqshadan góri tsıfrlyq tólemderge basymdyq berilgen, dep habarlaıdy Kazinform agenttiginiń tilshisi. 

Túrkııanyń Qarjylyq qadaǵalaý organy qazirgi ýaqytta joǵary nomınaldaǵy banknot shyǵarý jospary joq ekenin atap ótti.

Qazirgi ýaqytta aınalymda alty nomınal bar: 5, 10, 20, 50, 100 jáne 200 lıra. Eń sońǵy jáne eń úlken banknot 200 lıra 2009 jyly aınalymǵa engizildi jáne sońǵy jyldary ulttyq valıýtanyń satyp alý qabiletiniń aıtarlyqtaı tómendeýine jáne baǵanyń rekordtyq ósýine qaramastan, jańartylmady.

2019 jyly bastalǵan ınflıatsııalyq daǵdarys kezinde eldegi baǵa 670 paıyzǵa kóterilse, túrik lırasy 87 paıyzǵa qunsyzdandy. Alty jyl buryn quny 200 lıra bolatyn dál sol taýarlar jınaǵyn búginde satyp alý úshin 1540 lıra nemese eń joǵary nomınaldaǵy jetiden astam banknot qajet.

Nátıjesinde aınalystaǵy 200 lıralyq kýpıýralardyń úlesi kúrt ósti — olar buryn 11% ǵana bolsa, qazir barlyq banknottardyń 59%-ǵa jýyǵyn quraıdy. Olardyń usynysy 1490%-ǵa ósti, al basqa nomınaldardyń usynysy is júzinde ózgerissiz qaldy.

Soǵan qaramastan túrik bıligi jańa banknot engizýdi qajet dep sanamaıdy. Ekonomıster mundaı qadam ınflıatsııa týraly túsinikti arttyryp, ulttyq valıýtaǵa degen senimge nuqsan keltiretinin eskertti.

Sonymen qatar, Túrkııa qolma-qol aqshasyz tólem ádisterine jyldam ótýde. 2019 jyldan beri kartochkalyq jáne tsıfrlyq tranzaktsııalar kólemi 20 eseden astam (2 076%-ǵa) ósip, 20,2 trln lıraǵa jetti (eldegi kartany paıdalaný 86%-ǵa ósti). Sarapshylar elge kóleńkeli ekonomıkamen kúresýge jáne aqsha aǵynyna baqylaýdy kúsheıtýge jańa banknottardy shyǵarý emes, tsıfrlandyrýdyń septigi tıip jatyr dep esepteıdi.

Buǵan deıin Dúnıejúzilik bank Túrkııaǵa qatysty ekonomıkalyq boljamyn jańartqanyn habarlaǵan edik.