Túrkııada iri altyn kontrabandasy áshkerelendi: ettartqyshtyń ishinen 21,5 keli altyn tabyldy
ASTANA. KAZINFORM – Túrkııanyń Kyrshehır qalasynda polıtsııa qyzmetkerleri 21,5 keli kontrabandalyq altyndy tárkiledi. Qundy metall áýejaıdan taksımen tasymaldanǵan.
Kyrshehır polıtsııasynyń uıymdasqan qylmys pen kontrabandaǵa qarsy kúres basqarmasy júrgizgen arnaıy operatsııa barysynda altyn ettartqyshtyń, qamyr ıleıtin mashınanyń jáne aıaq kıim qalyptarynyń ishine jasyrylǵan kúıinde tabyldy.
Tekserý kezinde qala kireberisinde toqtatylǵan taksıden Ózbekstan azamatyna tıesili eki chemodan anyqtalǵan. Chemodandardyń ishin ashqanda, polıtsııa qyzmetkerleri altynnyń uqypty túrde turmystyq tehnıkalardyń ishine jasyrylǵanyn baıqaǵan.
Jalpy tabylǵan altynnyń salmaǵy 21 keli 506 grammdy qurady.
Kúdikti ustalyp, tergeý amaldary aıaqtalǵannan keıin qamaýǵa alyndy.
Kyrshehır gýbernatory Mýrat Sefa Demırıýrek aımaqtyń qaýipsizdigi men turaqtylyǵyn qamtamasyz etýde qylmyspen jáne kontrabandamen kúrestiń mańyzdylyǵyn atap ótip, polıtsııa qyzmetkerlerine kásibı eńbegi men tabandylyǵy úshin alǵys aıtty.
Aıta keteıik, Túrkııada iri banknottar shyǵarý keıinge shegerildi.