Túrkııada prezıdent saılaýy aǵymdaǵy jyldyń 10 tamyzynda ótedi
ASTANA. QazAqparat - Túrkııada prezıdent saılaýyn 2014 jyldyń 10 tamyzynda jańa erejeler boıynsha ótkizý josparlanyp otyr, dep habarlaıdy Ferǵana.
El konstıtýtsııasyna 2010 jyly engizgen ózgeristerge sáıkes, prezıdent alǵash ret halyqtyń daýys berýi arqyly saılanatyn bolady. Buǵan deıin el basshysyn parlament taǵaıyndap kelgen bolatyn. Sondaı-aq jańa ózgeristerge sáıkes, prezıdenttiń memleketti basqarý merzimi 7 jyldan 5 jylǵa qysqardy.
Aıta keterligi, aldaǵy prezıdent saılaýyna tuńǵysh ret shet elderde turatyn Túrkııanyń azamattary qatysa alady. Búginde shette júrgen 751 myń azamat tirkelgen. Buǵan qosa, 56 eldegi 118 túrik eliniń elshiliginde saılaý ýchaskeleri ashylady. Túrik aǵaıyndar 4 kún ishinde, ıaǵnı 31 shilde men 3 tamyz aralyǵynda qalaǵan úmitkerge óz daýysyn bere alady.
Agenttiktiń habarlaýynsha, bolashaqta Túrkııa prezıdenttik respýblıkaǵa aınalýy múmkin. Búginde eldi basqaryp otyrǵan Ádilettilik pen damý partııasy memlekettik qurylymnyń osyndaı formasyna kóshý jónindegi zań jobasyn ázirlep, parlament qaraýyna usyndy.
Qazirgi prezıdent Abdýlla Gıýl ázirge saılaýǵa qatysýǵa nıet bildirmedi. Premer-mınıstr Redjep Taııp Erdogan Konstıtýtsııaǵa Ádilettilik pen damý partııasy usynǵan memleket basshysynyń pozıtsııasyn kúsheıtetin ózgerister engizilse prezıdenttik saılaýda úmitker bolatynyn jetkizdi, dep jazady Ferǵana.
