Túrkııada polıtsııa áreketi saldarynan qazaǵa ushyraǵan jasóspirimniń ólimi qarsylyq aktsııasy tolqynyn týdyrdy
ASTANA. QazAqparat - Keshe Túrkııada qarsylyq ereýilderin qýyp taratý kezinde basyna kóz jasaýratatyn gaz kanıstri tıip, ótken jyldyń jazynan es-tússiz jatqan 15 jasar balanyń ólimi týraly habarǵa oraı qarsylyq aktsııasy tolqyny týyndady, dep habarlady RBK.
Ol kezde 14 jasta bolǵan Berkin Elvan óz otbasyna nan satyp alýǵa kóshege shyqqan bolatyn, dep habarlady Reuters. Kezdeısoq polıtsııa qurbany bolǵan ol qazirgi bılikke qarsylasýshylardy biriktirý sımvolyna aınaldy, olar bala jansaqtaý bóliminde jatqan kezde óneboıy aýrýhanada kezekshilikte boldy. 11 naýryz kúni keshte polıtsııa Ankaranyń ortalyǵyndaǵy Qyzylaı alańyna jınalǵan birneshe myńdaǵan sherýshilerdi qýyp taratý úshin sý shashatyn qurylǵylar men kózden jas aǵyzatyn gazdy qoldandy. Polıtsııa olardy alańnan yǵystyrǵannan keıin de sherýshilerdi mańaıdaǵy kóshelerden de túre qýdy, onyń barysynda birneshe qaqtyǵys oryn aldy. Mundaı oqıǵa Ystambuldyń ortalyq Istıklıal kóshesinde de bolyp, birneshe myńdaǵan adam jınaldy, sondaı-aq áleýmettik jelilerde jarııalanǵan shaqyrýlarǵa búkil Túrkııanyń birqatar jerlerinde ún qosqan qarsylyq aktsııalary boldy. Ońtústiktegi Adana qalasynda sherýshiler polıtsııany taspen atqylady, Іzmir jáne Eskishahar qalalaryndaǵy bas kóterýler ótken jyldan bergi eń aýqymdy oqıǵaǵa aınaldy.
Qarsylyq sherýleri Ystambul men Ankarada birneshe apta boıy jalǵasýda. Oǵan premer-mınıstr Redjep Taıyp Erdoǵannyń iri jemqorlyq janjalyna baılanysty ınternetke memlekettik baqylaýdy kúsheıtýge jáne sottar men prokýrorlardy taǵaıyndaýda úkimettiń yqpalyn arttyrýǵa baǵyttalǵan birneshe zań jobasy sebep boldy. Revolıýtsııalyq kásipodaqtar konfederatsııasy 2014 jylǵy 12 naýryzda ótetin jasóspirimdi jerleý rásimine qatysatynyn málimdedi. Elvannyń otbasyna Túrkııa prezıdenti Abdýlla Gúl kóńil aıtty. Elvan 2013 jylǵy mamyr-maýsym aılarynda bastalǵan eldegi qarsylyq aktsııalarynyń altynshy qurbany boldy, bul shara úkimettiń Ystambuldyń tarıhı bóligin qaıta salý jobasyn júzege asyrý nıetine baılanysty týyndady, oǵan jergilikti turǵyndar qarsy shyqqan bolatyn. Saıabaqty jańǵyrtýǵa qarsy sherýler Erdoǵannyń búkil 11 jylǵy bıligi kezindegi eń aýqymdy tártipsizdikter aktsııasyna ulasty.
