Túrkııada parlamenttik saılaý bastaldy
ASTANA. QazAqparat - Túrkııanyń barlyq aýmaǵynda búgin saılaý ýchaskeleri ashylyp, medjlıstiń (parlamenttiń) jańa quramyn saılaýǵa daýys berý bastaldy. Elde 53 mıllıonnan astam adam daýys bere alady.
Saılaý ýchaskeleri jergilikti ýaqyt boıynsha saǵat 08:00-de ashylyp, saǵat 17:00-de aıaqtalady. Daýys berýge kelýshiler sany 80 paıyzǵa jetýi yqtımal.
Barlyǵy saılaýǵa 20 saıası partııa, 165 táýelsiz kandıdattar qatysýda. Saıası arenanyń negizgi oıynshylary Ádildik pen damý bılik partııasy, oppozıtsııalyq Halyqtyq-respýblıkalyq partııa, Ulttyq qozǵalys partııasy bolyp otyr. 10 paıyzdyq elektoraldyq tosqaýyldy eńserýge qabiletti tórtinshi partııa kúrd halyqtyq demokratııalyq partııasy bolyp tabylady. Ol partııalyq tizim boıynsha medjlıske alǵash ret saılanýda.
