Túrkııada órtengen úılerdiń barlyǵy qaıta salynady
Bul týraly Prezıdent Rejep Taıyp Erdoǵan senbide Antalııa provıntsııasyndaǵy orman órtteri aımaǵyn tekserý qorytyndysy boıynsha ótken baspasóz máslıhatynda aıtty, dep habarlaıdy QazAqparat Anadolu agenttigine silteme jasap.
«Árbir zardap shegýshi memleketten kómek alady. Shyǵyn tolyq kólemde óteledi, salyq tólemderi keıinge qaldyrylady. Bir jyl ishinde apat aımaǵyndaǵy barlyq órtengen turǵyn úıler qaıta salynady. Qurylys óńirlerdiń sáýlet erekshelikterin eskere otyryp júrgiziletin bolady», - dedi Erdoǵan.
Prezıdent sondaı-aq órtten zardap shekkenderge úılerdi jalǵa berý úshin qarajat bólinetinin aıtty. Memleket fermerlerge, mal ósirýshilerge jáne jylyjaı ıelerine keltirilgen zalaldy óteıdi.
Orman órti aımaǵyndaǵy 35 aýyldy elektr energııasymen jabdyqtaý qalpyna keltirildi. Saqtyq sharasy retinde 12 eldi meken elektr qýatynan ýaqytsha ajyratyldy.
El prezıdenti 31 shilde kúni keshki ýaqyttaǵy jaǵdaı boıynsha orman órtteriniń kóptegen oshaqtary oqshaýlanyp, sóndirilgenin atap ótti.
«Sońǵy úsh kúnde ortman órtterin sóndirýge 4 myń adam tartyldy. Apat aımaǵynda 6 ushaq, 45 tikushaq, 1 ushqyshsyz tikushaq, 9 ushqyshsyz ushý apparaty, 117 órt sóndirý kóligi jumys istep jatyr», - dep atap ótti Erdoǵan.
Erdoǵan Ýkraına, Reseı, Ázerbaıjan jáne Iran elderi Túrkııaǵa kómekke ushaqtar jibergenin eske saldy.
«Órtten zardap shekken barlyq orman alqaby qalpyna keltiriledi. Jańbyrly maýsym bastalǵan kezde jańa aǵashtar otyrǵyzyla bastaıdy», - dedi Erdoǵan.
Eske sala keteıik, Túrkııada birneshe kúnnen beri orman órtteri órshýde.
Órt sóndirý qyzmetteriniń kúshimen Túrkııadaǵy 98 orman órtiniń 88-i oqshaýlandy. Buǵan deıin Túrkııada órt kezinde qaza tapqandar men zardap shekkenderdiń arasynda qazaqstandyqtar joq ekendigi habarlanǵan bolatyn.