Túrkııada orman órti órship tur
ASTANA.KAZINFORM — Órt sóndirýshiler Túrkııanyń Mýgla provıntsııasyndaǵy órtpen kúresip jatyr, dep habarlaıdy Kazinform agenttiginiń Ankaradaǵy tilshisi.
Mýgla provıntsııasynyń Mılas aýdanynda bastalǵan orman órti baqylaýǵa alyndy. Órt jerden de, áýeden de sóndirilip jatyr.
Órt keshe keshke Gıýrchamlardaǵy Bozbıýk aýdanyndaǵy ormandy alqapta bastaldy. Órt sóndirýshiler túni boıy jerústi kúshterin paıdalanyp órtpen kúresti, al tańerteń alty tikushaq pen tórt ushaq jumyldyryldy.
Júzdegen tótenshe jaǵdaılar qyzmetkerleri men ondaǵan arnaıy tehnıka da órtti sóndirý jumystaryna tartyldy.
Túrkııanyń Orman sharýashylyǵy bas basqarmasy negizgi órttiń aýyzdyqtalǵanyn habarlady.
Mýgla provıntsııasynyń gýbernatory Idrıs Akbyıyk kúndiz aımaqta alty orman órti bolǵanyn, onyń beseýi tolyǵymen sóndirilgenin habarlady. Onyń aıtýynsha, órttiń taralýyna joǵary temperatýra, tómen ylǵaldylyq jáne qatty jel yqpal etken.
Qaýipsizdik maqsatynda bir qonaq úı men turǵyn úı týrıstik kesheninen1 120 adam evakýatsııalandy. Órttiń shyǵý sebebi anyqtalyp jatyr.
Aıta keteıik, Túrkııanyń jaz mezgilindegi klımaty ár óńirde ártúrli bolǵandyqtan, eldiń túrli aımaǵynda bir mezgilde ártúrli tabıǵı apat bolýy múmkin.
Byltyr Túrkııanyń ońtústigindegi Antalııa provıntsııasynyń Manavgat aýdanynda orman órti órship turǵan sátte, eldiń soltústigindegi Qara teńiz óńirinde nóser jaýynnan sý tasqyny júrip, kóshkin boldy.
Buǵan deıin Djordjııadaǵy orman órti 120-dan astam úıdi qıratqanyn habarlaǵan bolatynbyz.
