Túrkııada óltirilgen reseılik elshiniń isine qatysty bes adam tutqyndaldy
ASTANA. QazAqparat - Túrkııada polıtseıler Ankarada óltirilgen reseılik elshi Andreı Karlovtyń isin tergeý aıasynda bes adamdy tutqyndady, dep habarlaıdy QazAqparat Anadolu agenttigine silteme jasap.
Karlov 19 jeltoqsan kúni Ankarada fotokórmeniń ashylý saltanaty barysynda atyp óltirilgen bolatyn.
Túrik bıliginiń málimetinshe, shabýyldy polıtsııa qyzmetkeri Mevlıýt Mert Altyntash jasaǵan, jergilikti qaýipsizdik kúshteri onyń kózin sol jerde joıǵan bolatyn. Reseı Syrtqy ister mınıstrligi oqıǵany terakti dep atady. RF Tergeý komıteti «halyqaralyq terrorızm aktisi» baby boıynsha qylmystyq is qozǵady.
Habarlanǵandaı, tutqyndalǵan bes azamattyń tórteýi Altyntashpen birge ishki ister organdarynda jumys istegender. Besinshi tutqyndalǵan - oppozıtsııalyq ıslam ýaǵyzshysy Fethýllah Gúlenniń (FETÖ) uıymynyń belsendisi.
Prokýratýranyń nusqasy boıynsha, FETÖ tálimgeri Sýleıman Ergen bolyp tabylady. Ustalǵan polıtsııa qyzmetkerleriniń aty-jónderi de jarııa etilýde: Ilker Er, Abdýlkadır ıAgın, Erdogan Erdınchlı jáne Zııa Shehıotglý. Olarǵa «qarýlanǵan terrorıstik uıymnyń qatarynda bolý» degen aıyp taǵyldy.
© AP Photo/ Burhan Ozbilici
