Túrkııada OQO-nyń ınvestıtsııalyq múmkindikteri tanystyryldy
Sapary barysynda aımaq basshysy isker top múshelerimen birge Túrkııa eliniń Ystambul qalasynda bolyp, birqatar óndiris oryndaryn aralap, jetekshi kásiporyn basshylarymen kezdesý ótkizdi.
Sonymen qatar oblys ákimi J.Túımebaev bastaǵan top Túrkııa memleketiniń burynǵy prezıdenti Abdýlla Gúlmen kezdesti. Áńgime barysynda Janseıit Qanseıituly eki el arasyndaǵy baýyrlastyq baılanystardy nyǵaıtýdaǵy eńbegin joǵary baǵalaıtynyn aıtty.
Budan bólek, delegatsııa 750 gektar aýmaqta ornalasqan «Ikıtellı» ındýstrıaldy aımaǵynyń jumysymen tanysty. Atalǵan aımaqta shaǵyn jáne orta 30 myńnan astam kásiporyn sátti jumys istep keledi. Olarda 300 myńdaı jumysshy eńbek etedi. «Ikıtellı» Túrkııadaǵy eń úlken ındýstrıaldy aımaq. Investıtsııalyq múmkindikteri men óndiristik, eksporttyq áleýetimen jáne jumyspen qamtýymen bul aımaq ekonomıkanyń damýyna úles qosyp keledi. Bul aımaq zamanaýı keshendegi óndiris jáne saýda qalashyǵy bolyp tabylady.
Baýyrlas eki eldiń isker top ókilderi men sarapshy mamandary bas qosqan jıynda qos eldiń saýda-ekonomıkalyq áleýetin arttyrý máseleleri keńinen talqylanyp, eki jaq ózara tájirıbe almasyp, áriptestik baılanystaryn nyǵaıtýǵa ýaǵdalasty.
Basqosýda oblystyń áleýmettik-ekonomıkalyq ahýaly men ınvestıtsııalyq múmkindikterin keńinen tanystyrǵan Janseıit Túımebaev búgingi tańda Ońtústik jerinde ındýstrıaldy-ınnovatsııalyq baǵdarlama aıasynda 1 arnaıy ekonomıkalyq jáne 11 ındýstrıaldy aımaq jumys istep jatqanyn málim etti.
«Bizde ındýstrıaldy aımaq óńirdegi barlyq aýdanda qurylǵan. Onda sheteldik ınvestorlar úshin barlyq jaǵdaı qarastyrylǵan. Biz úshin óndiris salasynda Túriktiń ozyq tehnologııasy men mamandardyń biliktiligin arttyrý baǵytyndaǵy is-tájirıbesi asa mańyzdy»,-dedi oblys ákimi.
Óz kezeginde túrkııalyq kásipkerler Qazaqstannyń júrgizip otyrǵan ınvestıtsııalyq saıasatyn oń baǵalap, ekijaqty qarym-qatynasty arttyrý qajettigine nazar aýdardy.
«Bizdiń óndiristik aımaqta oryn tepken birqatar kásiporyn basshylarymen birigip, aldaǵy shilde aıynda Qazaqstanǵa jumys saparmen barýdy josparlap otyrmyz. Onyń aıasynda qazaqstandyq kásipkerlermen kezdesip, ózara iskerlik baılanystardy tereńdetpekpiz. Túrkııa men Qazaqstannyń saýda-ekonomıkalyq áleýeti óte zor. Bul múmkindikterdi qos eldiń isker top ókilderi tıimdi paıdalanýy tıis dep esepteımin»,-deıdi Túrkııadaǵy «Eskop» óndiristik aımaǵynyń tóraǵasy ıÝsýf Aqgıýn.
Túrkııa Qazaqstannyń saıası jáne ekonomıkalyq turǵydaǵy eń jaqyn jáne senimdi seriktesine aınalǵanyn aıtqan «Bas tekstıl» JShS dırektory Talǵat Ysqaqov toqyma ónerkásibi jolǵa qoıylǵan Túrkııa elinen úırenerimiz kóp ekenin jáne osy sapardyń jemisti bolaryna senim bildirdi.
Jalpy Ońtúsik Qazaqstan - ınvestorlar úshin tartymdy óńir. Máselen munda elimiz boıynsha jalǵyz «Qazaq-túrik» ındýstrıaldy aımaǵy jumys isteıdi. Búginde atalǵan aımaqta baýyrlas elmen birlesken quny 25 mlrd teńgeni quraıtyn 6 ınvestıtsııalyq joba júzege asyrylýda. Nátıjesinde 900 jańa jumys orny ashylady dep kútilýde. Atalǵan jobalar kezeń-kezeńimen 2020 jylǵa deıin iske qosylatyn bolady.
Qazaqstan men Túrkııa elderiniń arasyndaǵy taýar aınalym búginde 2 mlrd AQSh dollar shamasynda bolsa, aldaǵy ýaqytta bul kórsetkishti 5 mlrd dollarǵa jetkizý kózdelýde. Bul jóninde dıplomatııalyq baılanystyń 25 jyldyǵy aıasynda qos memlekettiń kóshbasshylary ótken jyly Astana qalasynda bolǵan kezdesýde aıtqan bolatyn.
Túrkııa negizinen Qazaqstanǵa tekstıl, tamaq ónerkásibi men qural-saımandar ımporttasa, olar Qazaqstannyń munaıy men metaldaryna, hımııa ónerkásibi ónimderine erekshe qyzyǵýshylyq tanytyp otyr.
