Túrkııada nóser jaýynnan soń birneshe provıntsııany sý basty
ASTANA. KAZINFORM - Hataı, Osmanıe jáne Iozgat provıntsııalarynda tolassyz jaýǵan jańbyr saldarynan birqatar aýmaqty sý basyp, kólik qatynasy buzyldy, adam ólimi tirkeldi. Bul týraly Kazinform agenttiginiń Ankaradaǵy menshikti tilshisi habarlaıdy.
Eldiń ońtústik jáne ortalyq bólikterinde jaýyn-shashynnyń kúsheıýi turǵyndarǵa aıtarlyqtaı qıyndyq týǵyzdy. Hataı provıntsııasynyń Antakıa aýdanynda túnde bastalǵan jańbyr tań ata údeı túsip, kósheler men joldardy sý basty. Jol ústine jınalǵan sý saldarynan keıbir kólikter qozǵala almaı, olardy órt sóndirýshiler arnaıy tehnıkanyń kómegimen alyp shyqty. Qazir zardap shekken aýmaqtarda sý sorý jáne tazalaý jumystary júrgizilip jatyr.
Osmanıe provıntsııasynda da ahýal kúrdeli. Nóserden keıin kóshelerdi sý basyp, kólik qozǵalysy qıyndady, al mańyzdy jerasty ótkelderiniń biri ýaqytsha jabyldy. Sý turǵyn úılerge, kásipkerlik nysandarǵa jáne jertólelerge kirgen. Kommýnaldyq qyzmetter apat saldaryn joıý jumystaryn bastap ketti.
Túrkııanyń otbasy jáne áleýmettik qyzmetter mınıstri Mahınýr Ózdemır Góktásh memlekettik organdar jaǵdaıǵa jedel den qoıǵanyn málimdedi.
Onyń aıtýynsha, Kadırlı aýdanyndaǵy zardap shekkenderge kómek kórsetý úshin 2 mıllıon lıra (shamamen 22 mln teńge) bólingen. Aldyn ala derekke sáıkes, 200-den astam turǵyn úı, ondaǵan kásipkerlik nysan men kólik búlingen. Sonymen qatar eki adamnyń qaza bolǵany anyqtaldy. Qutqarý jáne qalpyna keltirý jumystary aıaqtalǵannan keıin turǵyndarǵa psıhologııalyq kómek kórsetiledi.
Iozgat provıntsııasynyń Aqdagmadenı aýdanynda Góndelen ańǵaryndaǵy ózen arnasynyń tasýy saldarynan aýylishilik joldy sý basty. Sý tasqyny turǵyn úıler men sharýashylyq qurylystarǵa zııan keltirdi. Tótenshe qyzmetterdiń aralasýynan keıin jol qozǵalysy qaıta qalpyna keltirildi. Alaıda naqty shyǵyn kólemi áli eseptelgen joq. Jergilikti turǵyndar múlikterin qorǵap, maldaryn aman saqtap qalýǵa óz kúshterimen áreket jasaǵan.
Bılik ókilderi tabıǵı apat saldarymen kúres jumystaryn jalǵastyryp, turǵyndardy aýa raıynyń qolaısyz kezeńinde saq bolýǵa shaqyryp otyr.
Osyǵan deıin Túrkııanyń Osmanıe qalasynda sel júrip, eki adam kóz jumǵany týraly jazdyq.