Túrkııada Mysyrdaǵy terakt qurbandaryn aza tutý kúni jarııalandy
ASTANA. QazAqparat - Túrkııa bıligi 27 qarasha, dúısenbi kúnin Sınaıdaǵy meshitte bolǵan terakt qurbandaryn aza tutý kúni dep jarııalady, dep habarlaıdy «Anadoly» agenttigi.
Agenttiktiń habarlaýynsha, kúni boıy Túrkııadaǵy jáne onyń shet elderdegi dıplomatııalyq ókildikterindegi memlekettik týlary túsiriledi.
24 qarashada Sınaı túbeginiń soltústiginde ornalasqan Bır-ál-Ábd eldi mekenindegi ár-Raýda meshitinde juma namaz kezinde jan túrshigerlik terakt boldy. Lańkester meshitti jol talǵamaıtyn 4 kólikpen qorshap alyp, jarylǵysh zatty qulshylyq qylyp jatqan adamdardyń ortasyna laqtyryp, jaryp jibergen. Artynsha meshitten qashyp shyqpaq bolǵandarǵa qaraı oq jaýdyrǵan. Terakt saldarynan 305-ten astam adam qaza taýyp, júzdegen adam aýrýhanaǵa jetkizildi.
Elde memleket basshysynyń tapsyrmasymen terrorıstik akt qurbandarynyń qurmetine úsh kúndik aza tutý kúni jarııalandy.
