Túrkııada muǵalimderge aq halat kııý mindetteldi
ASTANA. KAZINFORM — Túrkııanyń Bilim mınıstrligi mektepterge qatysty jańa erejeler engizdi. Onyń ishinde muǵalimderge arnaıy kıim úlgisin engizý jáne qaýipsizdik sharalaryn kúsheıtý talaptary bar.
Jańa talaptar 14 qyrkúıekte bastalatyn oqý jylynan bastap eldiń barlyq 81 provıntsııasynda qoldanylady.
Bilim mınıstrliginiń nusqaýlyǵyna sáıkes, memlekettik mektepterdiń muǵalimderi aq halat kııýge mindetti bolady. Mınıstrlik bul talap memlekettik qyzmettiń bedelin aıqyndaý qajettiligimen túsindirdi. Erejelerdiń saqtalýyn baqylaý óńirlik bilim basqarmalaryna júkteledi.
Sonymen qatar mektepterdegi qaýipsizdik sharalary kúsheıtiledi. Bilim berý uıymdarynyń aýmaǵynda baqylaýdaǵy kireberis oryndary uıymdastyrylyp, kólikter men jaıaý júrginshilerge arnalǵan qozǵalys baǵyttary bólinedi. Al jaryqtandyrýy nashar ýchaskelerge qosymsha jaryq ornatylýy tıis.
Túrkııanyń Іshki ister mınıstri Mustafa Chıftchı el boıynsha mektepterdi kúzetý úshin 30 myń qyzmetkerdi jumysqa alý josparlanyp otyrǵanyn málimdedi.
Sabaq kezinde uıaly telefon paıdalanýǵa qoıylǵan tyıym saqtalady. Sondaı-aq muǵalimder úı tapsyrmasyn tek resmı tsıfrlyq platformalar arqyly berýi tıis.
Jańa erejeler otbasy shyǵyndaryna da qatysty. Mektepter ata-analardan qymbat ımporttyq keńse taýarlary men bógde baspalardyń oqýlyqtaryn satyp alýdy talap ete almaıdy. Bul rette otandyq ónimderge basymdyq berilýi kerek. Sondaı-aq Bilim mınıstrligi bekitpegen emtıhandardy ótkizýge tyıym salynady.
Mektep bitirý sharalary men estelik rásimderine de qosymsha baqylaý engiziledi. Mundaı is-sharalarda paıdalanylatyn mýzyka, bannerler jáne ózge de materıaldar mınıstrliktiń tıisti keńesiniń aldyn ala kelisiminen ótýi kerek. Áleýmettik jelilerdegi jarııalanymdar pedagogıkalyq ádep normalaryna sáıkes bolýy tıis. Al mektep bitirý sharalaryn ótkizý ata-analarǵa qosymsha qarjylyq mindetteme júktemeýi qajet.
Aıta keteıik, Túrkııanyń bilim berý júıesinde bastaýysh jáne orta mektepterde 19 mıllıonnan astam oqýshy bilim alady.
Buǵan deıin Túrkııa bıligi Kahramanmarash pen Shanlyýrfa qalalaryndaǵy qarýly oqıǵalardan keıin mektepterdegi qaýipsizdikti kúsheıtý jónindegi keshendi jospardy júzege asyryp jatqany habarlanǵan bolatyn.
Aıta ketelik Túrkııa halqynyń sany 86,3 mln-nan asqan edi.
