Túrkııada mıgranttar mingen avtobýs aýdarylyp, 16 adam qaza tapty

VAN. QazAqparat – Túrkııanyń Van provıntsııasynda zańsyz kóship-qonýshylar mingen shaǵyn avtobýs aýdarylyp, saldarynan 16 adam qaza tapty jáne 51 jolaýshy zardap shekti, dep habarlaıdy Anadolý.

Jol-kólik oqıǵasy Van-Ozalp jolynda Ipekıolý aýdanyna jaqyn jerde bolǵan. Júrgizýshi rýldi basqara almaı, shaǵyn avtobýs jyraǵa túsip ketken. Oqıǵa ornyna jedel járdem brıgadasy men qutqarýshylar keldi. Zardap shegýshiler jaqyn mańdaǵy aýrýhanalarǵa jetkizildi.

Van provıntsııasynyń gýbernatory Mehmet Emın Bılmezdiń habarlaýynsha, keıbir jaraqat alǵandardyń jaǵdaıy aýyr.