Túrkııada mektepterge oqýshylardyń sýretin ınternette jarııalaýǵa tyıym salyndy
ASTANA. KAZINFORM – Túrkııanyń Bilim mınıstrligi oqýshylardyń derbes derekterin qorǵaýǵa baǵyttalǵan jańa erejelerdi engizdi, dep habarlaıdy Kazinform agenttiginiń Ankaradaǵy menshikti tilshisi.
Hürriyet Daily News basylymynyń málimetinshe, Túrkııanyń Bilim mınıstrligi mektepterge oqýshylardyń fotosýretteri men jeke derekterin resmı saıttarda, áleýmettik jelilerde jáne ózge de onlaın platformalarda jarııalaýǵa tyıym saldy. Osyǵan qatysty derbes derekterdi qorǵaýǵa baǵyttalǵan 10 sharany qamtıtyn nusqaýlyq eldegi barlyq bilim berý uıymdaryna joldandy.
Jańa talaptarǵa sáıkes, oqýshylar men mektep qyzmetkerleriniń fotosýretteri men beınejazbalaryn, synyp tizimderin, oqýshy kýáliginiń nómirlerin, Túrkııanyń jeke sáıkestendirý nómirlerin, emtıhan nátıjelerin, sabaqqa qatysý jáne oqý úlgerimi týraly málimetterdi jarııalaýǵa bolmaıdy.
Sonymen qatar mektepterge buǵan deıin jarııalanǵan materıaldardy qaıta qarap, ashyq qoljetimdiliktegi qujattardy, habarlandyrýlardy, fotosýretterdi, beınejazbalardy jáne jeke derekterdi qamtıtyn ózge de faıldardy alyp tastaý tapsyryldy.
Eger foto nemese beınetúsirilim bilim berý maqsatynda qajet bolsa, mektep ákimshiligi aldyn ala túsirilimniń maqsatyn, jarııalanatyn platformany, materıaldardy saqtaý merzimin jáne olarǵa qol jetkize alatyn adamdardyń sheńberin naqty aıqyndaýy tıis.
Bul sheshim muǵalimderdiń sabaqtardy beınetaspaǵa túsirip, oqýshylardyń qatysýymen túsirilgen beınerolıkterdi áleýmettik jelilerge jarııalap, mıllıondaǵan qaralym jınaýyna baılanysty kóp jyldan beri jalǵasyp kele jatqan pikirtalastar aıasynda qabyldandy.
Pedagogter men quqyq qorǵaýshylardyń pikirinshe, mundaı tájirıbe balalardyń jeke ómirine qol suqpaý quqyǵyn buzyp, olardy ınternet aýdıtorııasyna arnalǵan kontentke aınaldyrady.
Eske salaıyq, buǵan deıin Túrkııanyń Shanlyýrfa jáne Kahramanmarash provıntsııalaryndaǵy bilim berý mekemelerine jasalǵan qarýly shabýyldarǵa qatysty tergeý jalǵasyp jatqany habarlanǵan bolatyn.
Aıta ketelik Túrkııada joǵary bilim júıesin aýqymdy reformalaý josparlanyp otyr.
