Túrkııada mektep muǵalimi qarýly shabýyldan qaza tapty

Túrkııalyq Gazete Pencere basylymynyń málimetinshe, Farabı Anadoly lıtseıiniń ádebıet pániniń muǵalimi Mehmet Bılgılıge mektep aýlasynda óziniń jıeni oq atqan.

Jergilikti bıliktiń deregine sáıkes, muǵalim men onyń jıeni arasynda ázirge belgisiz sebeppen janjal týyndaǵan. Janjal kezinde kúdikti tirkelmegen atys qarýyn alyp shyǵyp, Mehmet Bılgılıge birneshe ret oq atqan.

Aýyr jaralanǵan muǵalimge alǵashqy medıtsınalyq kómek kórsetilip, aýrýhanaǵa jetkizilgen. Alaıda dárigerler onyń ómirin saqtap qala almady.

Shabýyldan keıin kúdikti oqıǵa ornynan qashyp ketýge árekettengenimen, kóp uzamaı quqyq qorǵaý organdarynyń qyzmetkerleri ony ustady.

– Bul oqıǵanyń bilim berý úderisine nemese oqýshylarǵa qatysy joq. Qarýly shabýyl týystar arasyndaǵy janjaldan týyndaǵan, – dedi Osmanıe provıntsııasynyń gýbernatory Mehmet Fatıh Serdengechtı.

Gýbernatordyń aıtýynsha, Bılgılı jıenin ózi tárbıelep, oǵan balasyndaı qaraǵan. Alaıda sońǵy ýaqytta olardyń arasynda kelispeýshilikter týyndaǵan.

Oqıǵanyń mán-jaıyn polıtsııa men prokýratýra tergep jatyr.

Aıta keteıik, Shvetsııa mektebindegi qarýly shabýyldan bir adam qaza taýyp, úsh oqýshy jaralandy.