Túrkııada «Qutty bilik» kitabynyń balalarǵa arnalǵan qazaqsha aýdarmasy jaryq kórdi

ALMATY. QazAqparat – Túrkııanyń Ankara qalasynda Júsip Balasaǵunnyń «Qutadǵý bilik» shyǵarmasynyń jazylǵanyna 950 jyl tolýyna oraı balalarǵa arnalǵan «Qutty bilik» shyǵarmasy qazaq tiline aýdarylyp basylyp shyqty, dep habarlaıdy QazAqparat tilshisi.

Kitap Túrkııanyń astanasy Ankara qalasynda jaryq kórgendikten osy qalada oqyp jatqan qazaqstandyqtarǵa, osynda ómir súretin qazaq otbasylaryna jáne Qazaqstannan kelgen qonaqtarǵa taratylyp jatyr.

Bul kitap alǵashqyda túrik tilinde jaryq kórip, keıinnen túrki halyqtarynyń tilderine aýdaryldy. Qazirgi tańda aýdarmalar arasynan tek qazaq tilindegi nusqasy ǵana basylyp shyqty.

Kitaptyń túrik tilinde osy shyǵarmany zertteýshi túrkııalyq ǵalym Erkan Góksý men oqytýshy Fatıh Akman daıyndady. Qazaq tiline Gazı ýnıversıtetiniń doktoranty Erjan Arǵynbaev pen Ál-Farabı atyndaǵy Qazaq ulttyq ýnıversıtetiniń doktoranty Aınur Ahmetova aýdarǵan.

«Kitapty túrik nemese ózge de túrki tilderine jarııalaýdaǵy maqsat - birinshiden, Qutty biliktiń jazylǵanyna 950 jyl tolýymen baılanysty. Al ekinshisi, Qutty bilik jalpy túrki halyqtaryna ortaq shyǵarma jáne onyń tárbıelik máni óte joǵary. Sol sebepti muny balalarǵa laıyqtap shyǵarý jáne jastardyń ózimizdiń babalarymyzdyń shyǵarmalarymen tárbıelenýine úles qosý kózdeldi», - dedi Gazı ýnıversıtetiniń doktoranty Erjan Arǵynbaev.

Balalarǵa arnalǵan «Qutty bilik» kitabyn «Úlkú Ojaklary» bilim jáne mádenıet qory túrik jáne túrki tilderinde daıyndatyp, shyǵardy. Kitap túrki tilderinen bólek orys, aǵylshyn, nemis jáne taǵy basqa tilderge de aýdarylyp jatyr.

Bul jańalyqty estigen soń kitap týraly qyzyǵýshylyq bildirip Qazaqstannan da oqyrmandar suratyp jatqan kórinedi.

«Qazirgi tańda kitap jaıly estip, suraǵan adamdarǵa Ankaradan Qazaqstanǵa baratyn adamdar arqyly kitapty berip jiberip jatyrmyz. Alaıda, Qazaqstanda taratylýy nemese satylýy jaıly áli naqty eshnárse aıta almaımyz. Eger kitaptyń elimizge jetkizilýine elshilik nemese basqa taraptardan qoldaý kórsetiletin bolsa, kitaptyń ekinshi basylymyn shyǵaryp Qazaqstanǵa jiberýge bolar edi», - dedi Erjan Arǵynbaev.

Avtorlardyń aıtýynsha, «Qutty bilik» kitabynyń túrik tilindegi nusqasynyń birinshi, ekinshi jáne úshinshi basylymdary 10 000, al tórtinshi basylymy 50 000 tırajben shyqqan bolatyn. Qazaq tilindegi nusqasy 1000 danamen shyqty. Kitaptyń taralýyna jáne oqyrmandardyń suranysyna qaraı aldaǵy ýaqytta ekinshi, úshinshi basylymdary da jaryqqa shyǵýy múmkin.