Túrkııada qurǵaqshylyqty baqylaý qyzmeti iske qosyldy
ASTANA. KAZINFORM – Túrkııa eldegi qurǵaqshylyq deńgeıin naqty ýaqyt rejıminde baqylaýǵa múmkindik beretin alǵashqy tegin servıs iske qosyldy, dep habarlaıdy Kazinform agenttiginiń menshikti tilshisi.
Ystanbul tehnıkalyq ýnıversıtetiniń tehnologııalyq parkinde mıkroklımat boıynsha sarapshy Gúven Fıdannyń jetekshiligimen Alkazar jasaǵan ınteraktıvti karta 1990 jyldan búgingi kúnge deıingi derekterdi qamtıdy.
Platforma paıdalanýshylarǵa kez kelgen qalany nemese aımaqty tańdaýǵa, keıingi 35 jyldaǵy qurǵaqshylyq ózgeristeriniń grafıkterin kórýge jáne uzaqmerzimdi kórsetkishterdiń taralýyn baǵalaýǵa múmkindik beredi.
Sarapshynyń aıtýynsha, Túrkııada turaqsyz jaýyn-shashyn, jerasty sýlary deńgeıiniń tómendeýi aýyl sharýashylyǵyna qaýip tóndirip jatyr. Sondaı-aq ol oǵan der kezinde shara qoldanylmasa, el keleshekte sý resýrstarynyń kúrdeli problemalaryna tap bolatynyn atap ótti.
Jańa qyzmet aýyl jáne sý sharýashylyǵy mamandaryna da, jalpy halyqqa da arnalǵan. Ázirleýshiler platformanyń bolashaqta jańa múmkindiktermen keńeıtiletinine ýáde berdi, onyń ishinde klımattyq parametrlerdiń egjeı-tegjeıli kórsetkishteri men ósimdik jaıyn taldaý qyzmeti bar.
Klımattyń ózgerýine jáne jer men sý resýrstaryna júktemeniń artýyna baılanysty 2023 jyldan beri búkil álemdi qurǵaqshylyq jaılaǵanyn buǵan deıin jazǵan edik.