Túrkııada Qurban aıt kezinde 14 myńnan asa adam jaraqat aldy

ASTANA. KAZINFORM — Qurban aıttyń alǵashqy kúninde Túrkııada qurbandyq shalý kezinde jaraqat alǵan 14 myńnan asa adamǵa medıtsınalyq kómek kórsetildi, dep habarlaıdy Kazinform tilshisi.

Bul týraly Túrkııanyń densaýlyq saqtaý mınıstri Kemal Memıshoǵly X áleýmettik jeli paraqshasynda málimdedi.

Mınıstrdiń aıtýynsha, medıtsınalyq kómekke júgingenderdiń eń kóbi Ankara qalasynda tirkelgen – 1049 adam. Ystanbulda – 753 adam, Konıa qalasynda – 655 adam jaraqat alǵan.

Túrkııanyń Densaýlyq saqtaý mınıstri mundaı oqıǵalardyń aldyn alý maqsatynda qurbandyq shalý jumystaryn tek bilikti mamandardyń oryndaýy qajet ekenin atap ótti. Onyń aıtýynsha, bul — halyqtyń qaýipsizdigin qamtamasyz etýdiń mańyzdy sharty.

Osyǵan deıin habarlanǵandaı, 6 maýsymda musylmandardyń dinı merekesi — Qurban aıt bastaldy. 3 kúnge sozylatyn bul meıramnyń basty atrıbýttary – aıt namazy, qurban shalý, qaıyrymdylyq sharalary jáne merekelik dastarhan. Qasıetti meıram qarsańynda Kazinform qurban shalý oryndary, arnaıy saıt, merekelik namaz ýaqyty syndy paıdaly derekterdi toptastyryp, oqyrman nazaryna usyndy.