Túrkııada kún men jel energetıkasynyń úlesi artty
ASTANA. KAZINFORM — On jyl ishinde Túrkııada kún jáne jel energetıkasynyń elektr energııasyn óndirýdegi úlesi aıtarlyqtaı ósti, dep habarlaıdy Ankaradaǵy Kazinform agenttiginiń menshikti tilshisi.
Túrkııanyń Energetıka jáne tabıǵı resýrstar mınıstrliginiń málimetinshe, 2016-2026 jyldar aralyǵynda elektr energııasyn óndirýdegi kún energetıkasynyń úlesi 0,4%-dan 11,6%-ǵa deıin ósip, 28 ese artqan. Al osy kezeńde jel energetıkasynyń úlesi 5,7%-dan 12,1%-ǵa deıin kóbeıgen.
Ornatylǵan qýat kólemi boıynsha da ósim baıqalady. Bıyl shilde aıynyń sońynda Túrkııanyń elektr energııasyn óndirýdegi jalpy ornatylǵan qýaty 126 476 MVt-qa jetti. Onyń ishinde kún elektr stantsııalarynyń qýaty 27 507 MVt nemese 21,7%-dy, al jel elektr stantsııalarynyń qýaty 15 358 MVt nemese 12,1%-dy qurady. Osylaısha, kún jáne jel energetıkasynyń jalpy ornatylǵan qýaty 42 865 MVt-qa nemese jalpy kórsetkishtiń 33,8%-yna jetti.
Sonymen qatar kún energetıkasy óndiris kólemi boıynsha rekord jańartýdy jalǵastyryp keledi. Shilde aıynda kún elektr stantsııalary óndirgen elektr energııasynyń kólemi 5,37 mlrd kVt·saǵatqa jetip, baqylaý tarıhyndaǵy bir aıdaǵy eń joǵary kórsetkish boldy. Bul rekord maýsym aıynda tirkelgen aldyńǵy eń joǵary kórsetkishten keıin jańardy.
Túrkııanyń Energetıka jáne tabıǵı resýrstar mınıstri Alparslan Baıraktardyń aıtýynsha, sońǵy on jylda el energetıka salasyn aýqymdy túrde qaıta ózgertti. Onyń sózinshe, kún jáne jel energetıkasyn damytý eldiń energetıkalyq táýelsizdikke tolyq qol jetkizýge, sondaı-aq neǵurlym taza ári qoljetimdi energetıkalyq júıe qalyptastyrýǵa baǵyttalǵan saıasatynyń bir bóligi.
Túrkııa úkimeti jańartylatyn energetıka áleýetin odan ári arttyrýdy josparlap otyr. Bul saladaǵy jańa maqsattar qarasha aıynda Antalıada ótedi dep josparlanǵan BUU-nyń Klımattyń ózgerýi jónindegi konferentsııasy – COP31 aıasynda tanystyrylady dep kútilýde.
Buǵan deıin Túrkııa energetıka salasyndaǵy halyqaralyq yntymaqtastyqty kúsheıtip jatqany týraly jazǵan bolatynbyz.
