Túrkııada Konstıtýtsııaǵa ózgeris engizý maqsatynda úsh referendým ótken – Mýharrem Akkaııa
«Bizdiń munda jınalýymyzdyń sebebin jaqsy bilesizder, Qazaqstan Konstıtýtsııasynyń úshten birine ózgertýler men tolyqtyrýlar engizý kózdelip otyr. Qazaqstan Ortalyq saılaý komıssııasynyń tóraǵasy qurmetti Nurlan Ábdirov myrzanyń arnaıy shaqyrýymen referendýmǵa halyqaralyq baıqaýshy retinde qatysyp otyrmyz. Osydan 1-2 kún buryn Túrkistan qalasyna ushyp keldik, onda da referendýmǵa daıyndyq jumysyn óz kózimizben kórdik. Odan keıin elordaǵa kelip, bul jaqtaǵy daıyndyq jumystarymen tanystyq. Uıymdastyrý jumysynyń joǵary deńgeıde ekenin, kóp eńbek atqarylǵanyn, barlyǵy óz retimen, júıeli túrde júzege asqanyn kórip otyrmyz. Búgin de tańerteń birneshe daýys berý ýchaskesine baryp úlgerdik, onda halyqtyń referendýmǵa degen qyzyǵýshylyǵy joǵary ekenin, belsendi qatysyp jatqanyn baıqadyq. Jáne biz barǵan ýchaskelerdiń bárinde daýys berý protsesi tártippen júıeli túrde ótip jatqanyn kórdik», - dedi M. Akkaııa Nur-Sultanda ótken baspasóz máslıhatynda.
Túrkııa ókili referendýmnyń únemi jáne jıi qoldanylatyn qural emes ekenin, biraq demokratııaǵa jol bastaıtyn birden-bir qural ekenin atap ótti.
«Qazaqstanda da 27 jyldan keıin referendým ótip otyrǵanyn da bilemiz. Osy referendýmnyń Qazaqstan halqyna, eline jáne bolashaqtaǵy demokratııasyna ıgilikke bastaıtyn jol bolady degen úmittemiz. Odan bólek, meniń bilýimshe Túrkııanyń Ankara, Ystanbul, Antalııa, Adana qalalaryndaǵy Qazaqstannyń dıplomatııa ókildikterinde Qazaqstan azamattarynyń daýys berýine jaǵdaı jasalǵan. Osy oryndarda saılaý ýchaskeleri uıymdastyrylǵan. Biz búgin Túrkııa atynan Joǵary saılaý keńesinen eki kisi kelip otyrmyz, biraq budan bólek Túrkitildes memleketterdiń parlamenttik assambleıasy, ıaǵnı TúrkPA quramyndaǵy depýtattardyń da Qazaqstanǵa kelip, ózderiniń baıqaýshylyq qyzmetterin júrgizip jatyr», - dedi ol.
Sonymen birge, Qazaqstan OSK tóraǵasy Nurlan Ábdirovpen jasaǵan ekijaqty kezdesýde taraptar eki eldiń saılaý uıymdarynyń arasynda yntymaqtastyqty odan ári damytý, qarym-qatynastardy nyǵaıtý jolynda naqty qadamdar jasaý jóninde ýaǵdalasqan.
Sóz sońynda spıker referendým quralynyń Túrkııada qanshalyqty jıi qoldanylatynyn aıtyp berdi.
«Túrkııada osy ýaqytqa deıin referendým tek qana Konstıtýtsııaǵa ózgertýler men tolyqtyrýlar engizý maqsatynda ǵana júrgizildi. Bul Túrkııa tarıhynda úsh ret júzege asyryldy – 1986, 2010 jáne 2017 jyldary, úsheýinde de sheshim qabyldandy», - dedi Mýharrem Akkaııa.
Buǵan deıin Halyqaralyq Túrki akademııasynyń baıqaýshylary Qazaqstandaǵy referendýmdy joǵary qyzyǵýshylyqpen baqylap otyrǵanyn aıtqan edi.
Olar tańǵy 7-den beri referendým ýchaskelerin aralap júr.
Sonymen birge, Qyrǵyzstannan Qazaqstanǵa 15 halyqaralyq baıqaýshy keldi. Olar Nur-Sultan men Almaty qalalarynda, Jambyl jáne Almaty oblystarynda jumys istep jatyr.
Jalpy Ortalyq referendým komıssııasy halyqaralyq uıymdar men shet memleketterden 272 ókildi baıqaýshy retinde akkredıttegen.
